Pòtoprens, 8 septanm 2022 [AlterPresse] —- Mobilizasyon kont gouvènman defakto a sanble ap pran jarèt nan divès zòn an Ayiti.
1. Mobilisayon kont gouvènman defakto a vle gaye toupatou, mèkredi 7 septanm 2022 a, nan peyi d Ayiti, kote aktivite yo te bloke, divès kote, sou teritwa nasyonal la.
2. Mèkredi 7 septanm 2022 a, 3 moun blese anba bal, epi te gen piyay ak zak vyolans anpil kote, nan Jeremi, depatman Grandans, kote te gen gwo tansyon, kawoutchou t ap boule, detan moun t ap tande anpil katouch ki t ap tire.
3. Nan moman gwo manifestasyon, k ap fèt yo, ddireksyon depatman Lwès lapolis la mande tout responsab lapolis, nan Pòtoprens, Dèlma ak Petyonvil, pran tout dispozisyon nesesè, pou asire sekirite bank yo ak kay ofisyèl premye minis yo, nan zòn Miso.
4. Pandan mobilizasyon yo ap monte, premye minis defakto Ariel Henry pran avyon 7 septanm nan pou ale Miami, Etazini, pou rankontre biznismann ki ta enterese envesti an Ayiti.
5. Jis nan finisman apremidi, mèkredi 7 septanm 2022 a, te gen anpil moso boutèy nan zòn Puits Blain, ki te bare ak barikad, dapre temwayay ki vin jwenn AlterPresse/AlterRadio.
6. Te gen gwo tansyon ak mouvman pwotestasyon tou Okay, depatman Sid, kote tout aktivite te bloke, nan Gonayiv ak Sen Mak, depatman Latibonit, nan Pòdpè, depatman Nòdwès, nan Miragwán, depatman Nip, ak Ti Gwáv, sou wout nasyonal nimewo 2 an, kote manifestan yo menase pou met sele sou bank ak mezo transfè yo.
7. Òganizasyon sitwayèn ak sitwayen pou yon lòt Ayiti konte pou pi piti 57 moun, ki mouri anba bal ak katyapika, kouto, nan mwa dawout 2022 a, sou teritwa nasyonal la.
8. Sendika anplwaye Apn yo, ki anchaje kontwòl waf nan peyi d Ayiti yo, menase pou aantre nan grèv, si anyen pa fèt pou asire sekirite zòn kote y ap travay yo, sitou nan Pòtoprens. Gen plizyè anplwaye Apn, gang ak zam kidnape nan dènye mwa sa yo.
9. Moun Bèl Fontèn, yon seksyon kominal Kwadèboukè, pouse yon gwo rèl, sou yon maladi, yo pa konnen, ki voye anpil moun al pran swen lopital, yon maladi ki koumanse gaye nan kominote a, dapre temwayay ki vin jwenn AlterPresse/AlterRadio.
10. Lannuit madi 6 pou antre mèkredi 7 septanm 2022 a, yon gwo dife fè anpil dega nan mache piblik Opoto, katriyèm seksyon kominal Gonayiv, depatman Latibonit.
11. Kò sasinay 7 jiyè 2021 an, sou ansyen prezidan defakto Jovenel Moïse lan, se yon kriim ki soti nan plizyè peyi. Se pou sa, se yon dosye konplike. Li p ap fasil pou jij enstriksyon travay sou krim sa a, jan lalwa peyi d Ayiti mande sa. Se dizon Sant analiz ak rechèch nan dwa moun.
[apr 07/09/2022 07:00]
Photo : barikad dife nan Ench, Plato santral.
Koutwazi Ronel Odatte
Consulter +
