Pòtoprens., 31 jiyè 2022 [AlterPresse] --- Finisman mwa jiyè 2022 a fè 15 jou, depi jounalis Edner Décime nan men kidnapè, ki te dappiyanp li, dimanch 17 jiyè 2022 a, ansanm ak yon pakèt lòt moun sou yon sèl jou.
Sa fè 15 jou tou, depi otorite yo non sèlman pa di anyen, men pa fè anyen pou fè tout moun sa yo retounen vin jwenn fanmi yo sen e sof, retounen viv viv lib e libè.
Depi 2 semenn, se anba britalite Edner Décime pa gen libète pou l fè sa l vle. Fanmi Edner Décime anba gwo doulè. Kidnapè yo ekzije fanmi l peye gwo kout lajan pou yo lage l. Chak minit, chak segonn k ap pase, latoumant lan, madoulè a ap pi rèd lakay fanmi Edner Décime, alòske kidnapè yo pa sispann fè presyon pou jwenn lajan.
Finisman mwa jiyè 2022 a, sa fè 15 jounen byen long, kote Edner Dècime twouve l lwen kolaboratris ak kolaboratè l yo, k ap viv moman doulè depi kidnapè ak zam retire l bò kote yo ak lafòs, an gwo ponyèt.
Kolèg Edner Décime yo toujou ap imajine Edner Décime nan yon liy, douvan estasyon distribisyon gaz, nan Dèlma 30 lan, lè endividi ak zam fòse l desann machin, kote l te ye a, epi pati bridsoukou avè l, nan yon machin ki te gen sirèn lapolis.
Ki kote bandi ak zam yo ale ak Edner Décime? Ki kote yo kenbe l? Nan ki katye? Nan ki baz gang ak zam yo? Ki jan Edner Décime ye? Nan ki eta l ye jodi a? Kouman l ye nan kò l? Kouman l rive fè fas kare ak presyon, kidnapè yo ap fè sou li san rete yo? Ki sa pou n fè douvan danje, ki pandye, lajounen kou lannuit, sou lavi Edner Décime, depi plizyè santèn èd tan?
Kè kase a kontinye ogmante, dotan plis fanmi Edner Décime pa kapab reyini gwo kout lajan kidnapè yo ekzije a. Yon fanmi ki pa t prete kòb nan men pèsonn, men ki twouve l bridsoukou nan sitiyasyon, kote y ap fòse l peye pou l rejwenn yon pitit, yon frè, yon mari, yon kouzen, tankou sa te konn fèt nan peryòd lesklavay, lè kolon yo t ap machande chat tèt esklav, yo t al kidnape nan peyi Afrik yo.
Malè pou yon moun, si kidnapè yo konnen ou mete zanmi w okouran zak yo fè a. Lè konsa, yo vin anraje, yo vin mande plis kout lajan pou lage moun yo dappiyanp lan.
Se yon bagay ki dwòl, pèsonn pa rive konprann poukisa gouvènman an fè silans sou zak kidnaping sa yo. Fanm kou gason, nan peyi d Ayiti, pa konnn ki pòt pou frape, ki sa pou yo fè, douvan zak laterè ak vyolans ak zam sa yo, ki lage fanmi yo nan gwo lapenn ak madoulè. Fanmi, ki sibi zak kidnaping yo, vin tonbe nan yon sitiyasyon degraba, avèk kantite lajan kidnapè yo ap mande yo a, alòske se men nan tèt douvan sitiyasyon sosyete a, k ap fin depafini.
Ant mwa janvye pou rive finisman mwa jen 2022 a, Òganizasyon nasyon zini konte 680 ka moun, bandi ak zam kidnape nan zòn metwopoliten kapital la, detan twoke kòn ant gang ak zam yo lakoz plizyè santèn moun pèdi lavi yo.
Nan sitiyasyon danje tout koulè ak gwo madoulè sa yo, nou di mèsi anpil pou tout mo solidarite, ki vin jwenn nou yo.
Ansanm ak fanmi kolaboratè nou an, AlterPresse/AlterRadio kontinye ap tann san pran souf jounalis Edner Décime retounen vin jwen nou sen e sof. [apr 31/07/2022 08:00]
Consulter +
