Lòt pase men fèt nan tèks la a 22:00
Pòtoprens, 8 jen 2022 [AlterPresse] --- Òganizasyon Nasyonzini pase konsiy, pou tout anplwaye nan sistem Nasyonzini an pa pran lari, apati 6 zè di Swa, dapre enfòmasyon ki soti nan AlterRadio, ki site sous diplomatik.
Konsiy la mande tou pou anplwaye Nasyonzini yo pa pran lari anvan 7è nan maten.
Pa gen lontan Nasyonzini te voye alèt bay anplwaye li yo, pou fè konnen, bandi te kidnape anplwaye nan machin Biwo Nasyonzini Binuh, yo volè machin nan, epi yo sèvi ak machin nan pou fè kidnaping ak lòt zak.
Dapre menm enfòmasyon yo, Nasyonzini te blije pran dispozisyon espesyal pou mete plis kontwòl sou tout moun k ap sèvi ak machin enstitisyon an.
Mezi Nasyonzini pran an pou l mande anplwaye li yo pou yo pa pran lari, apati 6zè di swa, rive nan moman klima laterè a ap monte grad divizyon an Ayiti, sitou nan zòn Pòtoprens ak alantou kapital la, kote gang ak zam yo ap taye banda.
Zak kidnaping wòdpòt, ki fè tout moun espannta, ap miltipliye san rete. Bandi menm jwenn mwayen antre anndan kay pou kidnape moun.
Nan menm moman an tou, gang yo ap ogmante nivo vyolans nan divès katye. Sa ki bay gwo laperèz.
Mèkredi 8 jen 2022 an, kout zam chante nan Tosel/Taba, nan nodès Pòtoprens ansanm ak Douya, nan nò kapital la. Anpil aktivite te paralize, oubyen ralanti. [apr 08/06/2022 18:00]
Photo : Binuh
Consulter +
