Pòtoprens, 14 jiyè 05 [AlterPresse]--- Lapolis nan Pòtoprens jwenn kadav jounalis Jacques Roche nan zòn Dèlma 4 maten jedi 14 jiyè a aprè bandi ak zam te fin kidnape l jou 10 jiyè a nan zòn Kris Wa, Nazon.
Bandi yo te menase pou touye Jounalis la si fanmi li pa ba yo 250 mil dola vèt. Daprè enfòmasyon yo, bandi yo te tòtire Jacques Roche anpil epi yo te minote l ak yon gwo chenn anvan yo touye l epi jete kadav la nan lari.
Jacques Roche, ki te gen 40 an, te reskonsab seksyon Kilti ak Sosyete nan Jounal «Le Matin ». Li te konn anime yon emisyon espò sou Radyo Ibo. Li te konn anime yon emisyon sosyal tou pou Gwoup 184, yon regwoupman asosyasyon divès sektè ki te konbat rejim lavalas la. Emisyon sa a te pase sou plizyè estasyon radyo ak televizyon.
Jacques Roche te yon powèt tou. Li deja pibliye twa CD pwezi ki pote tit « Le Vent de Liberté » (Van Libète a).
Depi 30 sektanm 2004, vyolans dechennen nan Pòtoprens. Patizan ame ansyen Prezidan Jean Bertrand Aristide toujou revandike zak sa yo.
16 jen ki sot pase a, jounalis Nancy Roc te blije kite peyi a pou yo pat kidnape l. 11 jen, nèg ak zam te manke kidnape Direktè jeneral Radyo Metwopòl la, Richard Widmaïer. [ do gp apr 14/07/05 12 : 00]
Consulter +
