Ayiti-Anviwonman : Soukous anba lanmè yo gen gwo konsekans sou aktivite pechè pwason nan Baradè

Baradè (Ayiti), 27 desanm 2021 [AlterPresse] --- Tè a, ki kontinye ap tranble, depi mwa dawout 2021 an, nan zòn Sid peyi d Ayiti yo, gen konsekans sou lanmè a, bò kòt yo, dapre Clitan Manda, yon pechè ki abite Baradè, ki trouve l nan depatman Nip, ki t ap pale ak AlterPresse/AlterRadio.

Sityasyon sa a lakoz maren pechè yo pa jwenn bon jan, bon kalte pwason nan lanmè a.

Pechè yo kritike otorite pwoteksyon sivil yo, ki poko janm vin fè ankenn sansibilizasyon, sou konpòtman kominote nan zòn Baradè yo dwe genyen, lè tè a ap tranble.

Anplis, poko gen ankenn ekip Ministè travo piblik, ki vin evalye kay yo, yon fason pou yo reponn epi fè fas kare ak soukous yo.

Maren pechè yo fè konnen kominote Baradè yo blije domi ak yon je ouvè, yon je fèmen, akoz malè pandye sa a ki sou tèt yo.

Maren pechè yo di tou yo toujou santi gwo soukous sou lanmè a. Sa ki konn ba yo gwo laperèz.

Yo mande otorite yo voye je gade yo, pou yo ka kontinye fè travay yo kòmsadwa.

Tè a kontinye tranble, prèske san rete, nan zòn Sid peyi d Ayiti a.

Dimanch maten 26 desanm 2021 an, te gen ankò yon soukous, pwofondè 15 kilomèt, ki te nan nivo 3.4, sou yon distans 41 kilomèt nan nòdwès Miragwán, depatman Nip.

Samdi maten 25 desanm 2021 an, tè a te tranble, pwofondè 15 kilomèt tou, nan nivo 3.3, sou yon distans 39 kilomèt, nan nòdès Okay, depatman Sid. [jep emb rc apr 28/12/2021 13:35]