Ensekirite an Ayiti, yon gwo chay ansyen opozisyon an ap ede Ariel Henry pote

Gotson Pierre

Pòtoprens, 28 nov. 2021 [AlterPresse] —- Kowalisyon gouvènmantal ki tabli sou pouvwa an Ayiti, apre remaniman ministeryèl 24 novanm nan, konsidere kesyon ensekirite tankou yonn nan pi gwo defi, pandan zak vyolans kontinye ap miltipliye epi kantite ka kidnapin ap pete plafon, dapre sa AlterPresse/AlterRadio obsève.

Chanjman nan gouvènman defakto Ariel Henry a, kote 8 nouvo minis antre, se pi gwo evènman politik nan jou sa yo. E ak chanjman sa a wout la ouvè pou premye minis la aplike plan li genyen, ak api divès sektè politik.

Moun, ki antre nan gouvènman an, soti, antwòt, nan plizyè òganizasyon ak regwoupman politik ki te siyen yon akò ak Ariel Henry, nan dat 11 septanm 2021, epi ki fè pati kowalisyon gouvènmantal la.

Ariel Henry rekonèt wout la pap fasil pou rive nan bon jan rezilta. Se konsa Regwoupman Ansanm nou fò (Anf), ki pami alye pouvwa a, wè pèspektiv yo tou.

Prezidan Anf la, ansyen depite Jean-Tholbert Alexis, tante bay asirans sou volonte ekip gouvènmantal la, pandan li t ap patisipe nan magazin TiChèzBa sou AlterRadio 106.1 FM (Samdi 7èAM-3èPM / Dimanch 7èAM-1è-5èPM).

Devan nivo konplikasyon kriz ensekirite a, kesyon ap poze sou kapasite reyèl ak volonte politik gouvènman ki la a pou l rive tabli kè poze tout bon nan peyi a. Yo ensiste tou sou ekonomi peyi a k ap fin kraze nèt.

Jean-Tholbert Alexis fè konnen modòd Ariel Henry klè kou dlo kòk. Se « tolerans zewo » pou bandi, ki pase yon lòt vitès dènye jou sa yo nan kidnape moun.

4 mwa apre Ariel Henry rive nan primati a, vyolans ak ensekirite a angrave epi paralize ekonomi an nèt, pandan gang yo vale teren. Nan semèn pase a, sèten jou, yo konte plis pase 20 ka kidnapin moun nan divès kouch nan popilasyon an epi nan divès sektè aktivite.

Anplis divès zòn gang yo kontwole, yo te menm rive mete men sou yon resous estratejik tankou gaz la, sa ki bay yon kriz san parèy.

Malgre yon lòt lidèchip nan tèt lapolis la, ki ta sanble vle afwonte pwoblèm ensekirite a, anpil militan ak dirijan òganizasyon politik kesyone yo sou volonte premye minis defakto a, ki prezante tèt li kòm eritye ansyen prezidan Jovenel Moise, epi ki vle aplike je fèmen ajennda ansyen chèf Leta a.

Plizyè pati politik rejte remaniman ministeryèl Ariel Henry a, yo kalifye kò « yon pataj gato ». Genyen ki montre yo gen dout, men tou genyen lòt ki montre yo satisfè epi ki bat bravo pou « ekilib » yo di ki tabli nan mitan ekip gouvènmantal la.

Tout fason, plizyè reskonsab politik ki anbake nan esperyans sa a, rekonèt, atant yo anpil. Rive satisfè yo pa senp ditou.

Pou piti, sa mande yon volonte politik klè, ki dwe rive manifeste parapòta divès dosye, patikilyèman kesyon gang yo, kesyon masak nan katye popilè yo ki te fè kenken pandan administrasyon Moïse la epi dosye gaspiyay 1.4 milya Dola éd Venezyela te bay Ayiti atravè pwogram Petwokaribe. [gp apr 28/11/2021 12:00]

Foto : kopi ekran videyo