Ayiti-Kriz : Nouvo gouvènman defakto Ariel Henry an p ap bay ankenn rezilta, dapre divès òganizasyon

Pòtoprens, 25 novanm 2021 [AlterPresse] --- Nouvo gouvènman premye minis defakto Ariel Henry an pa pral bay ankenn rezilta pozitif, nan pwoblèm peyi d Ayiti ap fè fas jounen jodi a, dapre dizon plizyè òganizasyon politik bay AlterPresse/AlterRadio.

Se dizon plizyè òganizasyon politik, tankou pati politik Inyon nasyonal pou entegrite ak rekonsilyasyon (Unir), Ayiti an aksyon (Aaa) ak Rasanbleman sosyalis pou yon inisyativ nasyonal tou nèf (Rasin kan pèp la), nan entèvyou yo bay AlterRadyo/AlterPresse.

Moun, ki antre nan nouvo gouvènman defakto sa a, soti nan yon seri pati politik, ki te siyen yon akò, nan dat 11 septanm 2021, nan lide pou te jwenn pòs, pou kapab jere entère gwoup politik yo, dapre deklarasyon kòdonatè pati Unir lan, Clarens Renois.

Ansyen kandida pou pòs prezidan an kwè demach, ki te dwe mennen nan mete kanpe gouvènman sa a, pa bon, paske pa gen okenn demach tèt ansanm, ki te fèt ant divès sektè, nan lavi nasyonal la, ki siyen divès lòt akò.

Clarens Renois di li poko janm twò ta pou premye minis defakto a mache kontre ak moun ki siyen divès lòt akò, ki te sou tab la, yon fason pou jwenn plis antant sou fason l ap dirije Leta a.

Moun, ki okipe pòs nan nouvo gouvènman sa a, gen oblikasyon pou byen jere ti kras resous Leta genyen yo, pou yo pa montre se zafè pèsonèl yo vin regle, andedan yon gouvènman ki vin pataje gato, dapre Clarens Renois.

Ariel Henry mete sou pye yon nouvo gouvènman, li enstale ofisyèlam, aswè mèdredi 24 novanm 2021 an, nan rezidans ofisyèl li.

Nouvo gouvènman defakto a gen ladan 8 nouvo minis epi Ariel Henry, ki jwe wòl nouvo minis kilti ak kominikasyon.

Pèsòn pa bezwen espere nouvo gouvenman defakto sa a pral pote rezilta pozitif pou peyi a, nan fason li monte a, dapre Pati politik Ayiti a aksyon (Aaa).

Se vre, gen kèk chanjman pami pèsonalite, ki antre nan gouvènman sa a. Men, sa p ap ede rezoud okenn pwoblèm, tankou, pami lòt, pwoblèm klima laterè a, dapre Kòdonatè nasyonal pati politik Aaa a, ansyen senatè Youri Latortue.

Ansyen senatè depatman latibonit di li nesesè pou gen yon tèt ansanm lajman laj, ant divès gwoup ki siyen tout akò yo, pou retire peyi a nan sitiyasyon malouk li twouve l la.

Men tou, li enpòtan pou gen yon bon jan plan sekrite, ki tabli nan peyi a, pou fè lapè ak kè poze retounen sou tout tèritwa nasyonal la, pou kapab genyen bon jan eleksyon ki fèt nan delè sa posib.

Pati politik Rasin kan pèp la di, limenm, li voye jete aksyon premye minis defakto a poze a, lè l deside monte yon nouvo gouvènman, san okenn tèt ansanm epi san li pa gen lejimite pou li poze yon aksyon konsa.

Camille Chalmers, ki se pòtwa pati politik Rasin kan pèp la, fè konnen Ariel Henry pa gen kapasite, pou pote repons sou divès pwoblèm, k ap trakase peyi a.

Nan sans sa a, nouvo gouvènman defakto sa a p ap pote okenn solisyon nan pwoblèm fondamantal, peyi a ap konnen yo, ni sou plan sekirite, ni sou plan ekonomik, dapre pati politik Rasin kan pèp la

Sou bò pa l, Sektè demokratik ak popilè a (Sdp), youn nan gwoup politik, ki siyen akò 11 septanm 2021 Ariel Henry an, deklare nouvo gouvènman defakto sa a, se ta yon gouvènman ki byen balanse.

Detan l di l ap tann rezilta yo, pòtwa sektè demokratik popilè a, mèt Michel André, ki te prezan nan seremoni enstalasyon an, fè konnen nouvo gouvènman sa a ta monte sou baz yon tèt ansanm ant divès sektè. [kap emb rc apr 25/11/2021 12:55]