Pòtoprens, 21 novanm 2021 [AlterPresse] --- Depi dat vandredi 19 novanm 2021 an, Ayiti gen yon konsila nan vil Tapachula, nan leta Chiapas, pa twò lwen fontyè ak peyi Gwatemala, nan yon moman kote anpil fanm ak gason migran natif natal Ayiti vin tabli sou teritwa meksiken an, dapre enfòmasyon ki vin jwenn ajans sou Entènèt AlterPresse.
Sekretarya relasyon etranje nan peyi Meksik anonse gen yon konsila peyi d Ayiti, ki louvri, vandredi 19 novanm 2021 an, nan vil Tapachula, nan gran zòn yo rele Leta Chiapas, pa twò lwen fontyè ak peyi Gwatemala.
Gouvènman peyi Meksik la asepte pou konsila peyi d Ayiti a louvri nan vil Tapachula a, yon fason pou ranfòse estrikti jesyon migrasyon an nan peyi Meksik, dapre sa plizyè medya entènasyonal ekri.
Inisyativ pou gen yon konsila peyi d Ayiti, ki louvri nan Tapachula a, soti nan yon brase lide, ki te fèt nan Mexico, kapital peyi Meksik la, ant anbasad peyi d Ayiti nan Mexico, sekretarya relasyon etranje nan peyi Meksik ak Enstiti nasyonal migrasyon peyi Meksik lan.
Pote kole, nan divès kalte sèvis nesesè yo, ak fanm ak gason migran ayisyen yo, ki nan zòn Sidès peyi Meksik la, se youn nan prensipal objektif, desizyon pou louvri konsila ayisyen sa a nan Tapachula a, dapre sa jounal diario de Chiapas ekri.
Jisteman, semen ki sot pase a, te gen yon karaván apeprè 3 mil fanm ak gason migran, ki soti divès peyi, laplipa pami yo se natif natal Ayiti, ki pati, kite vil Tapachula a, pou yo ka rive sou fontyè ak peyi Etazini, pou chèche antre sou teritwa ameriken an.
Se direktè jeneral ministè afè etrannje peyi d Ayiti a, Sam Beausoleil, ansanm ak anbasadè ayisyen an, nan peyi Meksik, Hugues Momplaisir Féquière, ki te dirije seremoni pou louvri konsila Ayiti a nan Tapachula a, vandredi 19 novanm 2021 an, ki sot pase a.
Seremoni an te fèt douvan anplwaye sekretarya relasyon etranje peyi Meksik, anplwaye Enstiti nasyonal migrasyon peyi Meksik, lòt otorite leta Meksik, otorite lakomin nan Chiapas ak reprezantan plizyè òganis entènasyonal. [rc apr 21/11/2021 15:00]
Consulter +
