Ayiti-Klima laterè : Gang ak zam 400 mawozo yo lage 2 sou 17 misyonè ameriken ak Kanadyen, yo kidnape depi samdi 16 oktòb 2021 an

Pòtoprens, 21 novanm 2021 [AlterPresse] --- Se legliz ameriken, nan Ohio a, kote 17 misyonè ameriken ak kanadyen yo te konn travay, ki bay nouvèl la, nan yon nòt yo fè soti dimanch 21 novanm 2021 an, nan espas Entènèt yo, AlterPresse te li.

« 2 misyonè sa yo, gang ak zam yo lage a, pote yo byen. N ap okipe yo. Nou pa kapab bay plis enfòmasyon, kounye a », dapre nòt legliz ameriken an.

« Nou pa kapab bay ni konfime non moun, gang yo lage yo. Nou pa kapabdi, non plis, nan ki kondisyon yo rive lage, ni ki kote yo ye kounye a. Nou mande diskresyon, bò kote tout moun ki ta gen detay enfòmasyon sa yo ».

Se samdi 16 oktòb 2021 an, gang kriminèl ak zam 400 mawozo yo te kidnape 17 misyonè yo, 16 Ameriken ak 1 Kanadyen, nan zòn Kwadèboukè, detan yo te nan yon machin, apre yo te fin vizite yon òfelina.

Sou 17 moun, gang kriminèl 400 mawozo yo, te kidnape samdi 16 oktòb 2021 an, te gen 12 granmoun, ki gen ant 18 pou rive 48 lane, plis 5 timoun, ki gen laj 8 mwa, 3 lane, 6 lane, 13 lane ak 15 lane.

Nan yon videyo, li te fè soti, finisman mwa oktòb 2021 an, chèf gang 400 mawozo a, ki rele Wilson Joseph, ki bay tèt li non « Lanmò 100 jou », te fè menas pou touye 17 misyonè, li kidnape yo, si yo pa ba l 17 milyon dola ameriken, li mande pou lage yo.

Kèk jou an apre, lapolis nasyonal d Ayiti te fè konnen li gen prèv 17 misyonè yo vivan.

Ajan Federal bureau of investigation (Fbi) ap travay ak inite kont kidnapin, nan lapolis nasyonal d Ayiti a, pou fè lage 17 misyonè ameriken ak kanandyen sa yo, dapre medya entènasyonal yo.

Nan mwa avril 2021 an, se te menm gang kriminèl ak zam 400 mawozo yo, ki te kenbe, pandan 20 jou, 15 manm legliz katolik women, pami yo 2 natif natal peyi Lafrans.

Sa gen 2 semenn, gouvènman ameriken an ak gouvènman kanadyen yo te mande natif natal yo, ki nan peyi d Ayiti, degaje yo kite peyi d Ayiti, akoz sitiyasyon briganday, ki genyen sou teritwa nasyonal la, kote pwoblèm gaz la anpeche divès branch aktivite travay kòmsadwa.

Ant mwa janvye pou rive mwa novanm 2021 an, gang ak zam yo fè plis pase 800 kidnaping, dapre yon ranmse Sant ayisyen analiz ak rechèch nan dwa moun.

Yo ba yo gwo kout lajan pou lage moun yo kidnape yo. Gen nan moun yo kidnape yo, gang ak zam yo touye.

Anpil òganis dwa moun lonje dwèt sou konpòtman manfouben otorite Leta yo, ki pa fè anyen pou kwape gang kriminèl ak zam yo, k ap simaye toupatou sou teritwa nasyonal la.

Klima laterè sa a, se ta yon zouti pou ekip, ki dappiyanp pouvwa politik la kontinye kenbe pouvwa a, dapre divès vwa. [rc apr 21/11/2021 15:00]

Foto : Christan Aid Ministries / Ayiti