Haiti
Atik

Ayiti-Klima laterè : Anplwaye imigrasyon nan Pòtoprens leve kanpe, mèkredi 13 oktòb 2021 an, kont kidnaping sou kòlèg yo Johnson Joseph


Ekri jou mèkredi 13 oktòb 2021

Pòtoprens, 13 oktòb 2021 [AlterPresse] --- Wout Lali, yo rele depi plizyè lane avni John Brown, nan Pòtoprens, bloke, depi byen bonè, mèkredi 13 oktòb 2021 an, ak yon mouvman pwotestasyon anplwaye sèvis imigrasyon, kont kidnaping gang ak zam fè sou kòlèg yo, Johnson Joseph, dapre temwayaj ki vin jwenn ajans sou Entènèt AlterPresse.

Se nan komin Kwadèboukè, bandi kriminèl ak zam kidnape, madi swa 12 oktòb 2021 an, Johnson Joseph, dapre menm sous yo.

Depi plizyè semen, se chak jou gang kriminèl ak zam yo ap dappiyanp moun, san gade dèyè, sou teritwa nasyonal la.

Pandan tan sa a, lapolis nasyonal d Ayiti kontinye di li ta sènen tout kote, nan zòn metwopoliten Pòtoprens lan, pou kwape zak bandi ak zam.

Pwomès lapolis sa yo pa koreponn ak reyalite, nan tout katye, nan zòn metwopoliten Pòtoprens lan, kote popilasyon an lage poukont li, anba reny gang ak zam yo.

Lendi 11 oktòb 2021 an, gang kriminèl ak zam nan Matisan blese anpil moun ak bal, dechèpiye ak maspinen anpil lòt, ki te nan yon machin transpò piblik, san lapolis pa t fè anyen.

Toupatou, nan peyi d Ayiti, tout moun ap leve vwa yo, pou di ase, li lè li tan, pou zak briganday ak laterè sa yo fini sou teritwa nasyonal la.

Detan sekirite a se pi gwo pwoblèm jodi a, nan peyi d Ayiti, se eleksyon gouvènman defakto Ariel Henry an pito konsidere kòm priyorite.

Depi dat 20 jiyè 2021 an, lè sendika anbasadè peyi etranje, yo rele Core group la, te fè enstale gouvènman defakto Ariel Henry an, nan tèt peyi d Ayiti, pa gen okenn dispozisyon pou garanti sekirite tout bon nan peyi d Ayiti, dapre anpil vwa nan divès sektè. [rc apr 13/10/2021 11:00]