Haiti
Atik

Ayiti-Klima laterè : Gwo tansyon, nan divès katye, apre bandi ak zam kidnape plizyè moun, pami yo pastè Eliodor Devariste, nan zòn metwopoliten Pòtoprens lan


Ekri jou lendi 11 oktòb 2021

Pòtoprens, 11 oktòk 2021 [AlterPresse] --- Gwo tansyon, lendi maten 11 oktòb 2021 an, nan plizyè katye, nan zòn metwopoliten Pòtoprens lan, dapre enfòmasyon ki vin jwenn ajans AlterPresse.

Nan zòn Montay nwa, Petyonvil, wout lan bloke ak yon mouvman pwotestasyon kont kidnaping, bandi ak zam fè sou 3 jèn, dimanch swa 10 oktòb 2021.

Nan Dèlma, plizyè fidèl leve kanpe, pou ekzije bandi ak zam lage, san kondisyon, pastè Eliodor Devariste, youn nan responsab legliz metodis Dèlma 28, yo kidnape samdi 9 oktòb 2021 an.

Dimanch 3 oktòb 2021 an, bandi ak zam kidnape, nan legliz Jesus Center Dèlma 29, pastè Jean Mary Ferrer Michel ak 2 lòt moun, ki toujou nan men yo.

Dimanch 26 septanm 2021 an, bandi ak zam te touye dyak Sylner Lafaille epi kidnape madanm li, Marie Marthe Laurent Lafaille, nan antre premye legliz Batis Pòtoprens.

Se jedi 30 septanm 2021 an, bandi ak zam sa yo te lage Marie Marthe Laurent Lafaille, apre yo te resevwa gwo kout lajan. [jep emb rc apr 10/11/2021 09:46]