Politik : Semèn sa a, Komisyon sitwayen k ap chèche yon solisyon ayisyen nan kriz la kapab chita pale ak Ariel Henry

Pòtoprens, 13 septanm 2021 [AlterPresse] --- Komisyon sitwayen an k ap chèche yon solisyon ayisyen nan kriz lan di li ta dispoze chita pale ak premye minis Ariel Henry, jedi 16 septanm oubyen vandredi 17 septanm 2021, dapre enfòmasyon AlterPresse rive jwenn.

Komisyon an presize akò 30 dawout 2021 an, plizyè òganizasyon politik dakò an, prevwa yon ekzekitif, ki gen yon prezidan ak yon premye minis.

Plizyè òganizasyon, ki te siyen akò 30 dawout 2021 an, pou jwenn yon solisyon ayisyen an kriz la, anonse y ap kanpe an kwa kont tranzisyon kontinite Pati ayisyen tèt kale a (Phtk).

Yo mande komisyon sitwayen an mete kanpe, pi vit posib, komite suivi akò 30 dawout 2021 an ak konsèy nasyonal tranzisyon an.

Samdi 11 septanm 2021 an, plizyè pati politik, ki te konn di yo nan opozisyon kont rejim tèt kale a, siyen yon akò, yo kwè pou evite latwoublay nan peyi d Ayiti, ak eritye Jovenel Moïse la, Ariel Henry, ki enstale, depi madi 20 jiyè 2021, kòm premye minis defakto, sou presyon kominote entènasyonal la.

Sektè ki di li demokratik ak popilè a (Sdp) deklare li chwazi siyen akò a ak Ariel Henry, pakse se ta yon akò ki konsidere tout revandikasyon popilè yo, tankou pwosè divès masak, ki fèt nan katye popilè yo, ak divès krim lajan, tankou wout kwochi ak lajan PetwoKaribe a, epitou akò Ariel Henry a ta prevwa pou fè lage prizonye politik yo

Pati politik Ayiti an aksyon (Aaa), ki deklare li pa siyen akò ak Ariel Henry an, akoz akò sa a pa kenbe plan sekirite, Ayiti an aksyon an te pwopoze a, mande tout sektè mete tèt yo ansanm, pou jwenn yon akò definitif.

Gwoup politik, yo plis konnen sou non Inisyativ Sosyete sivil la, di li swete yon akò nètalkole, ant tout sektè nan lavi nasyonal la, yon akò ki dwe konsidere klima laterè peyi a ap sibi, depi plizyè mwa yo.

Jiska prezan, 2 akò, òganizasyon politik siyen yo, pa konsidere tout bagay, ni anvizaje pote repons serye nan sitiyasyon kriz, k ap gangrennen peyi d Ayiti a, depi plizyè mwa, dapre Inisyativ sosyete sivil la.

Peyi d Ayiti ka tonbe nan plis tyouboum, sizoka ekip tèt kale, ki sou pouvwa a, ta òganize eleksyon, san yon akò politik konsekan, nan peryòd sa a, kote peyi a anba yon klima laterè, kote tou gen hing hang politik nan peyi a.

Se pinga delege espesyal ameriken sou peyi d Ayiti a, Daniel Foote, nan yon brase lide sou tranbleman tè 14 dawout 2021 an, ki te fèt, jedi 9 septanm 2021 an, nan Florida International University (FIU). [apr 13/09/2021 11:45]