Pòtop., 24 jen 2005 [AlterPresse] --- Sekretè jeneral an apre òganizasyon Nasyon Zini nan zafè Operasyon mete Lapè a, Jan Mari Geyeno, rantre nan peyi Dayiti 22 jen. Diplomat la gen pou l pase pou pi piti 5 jou pou bouske enfòmasyon sou sitiyasyon peyi Dayiti jounen jodi a.
Pandan vizit sa, Jan Mari Geyeno ap gen pou chita pale ak chèf sivil misyon Nasyon Zini pou lapè nan peyi a Juan Gabriel Valdés, prezidan peyi a Bonifas Aleksann ak premye minis Jera Latòti.
Menm jounen 22 jen an, Konsè sekirite Nasyon Zini a te deside pwolonje manda fòs Loni a nan peyi Dayiti epi ogmante efektif twoup li yo. Pou kounye a pral gen 8475 militè ak polisye sivil kap gen pou bay sekirite pandan eleksyon yo nan peyi Dayiti.
Yon sòlda brezilyen andedan fòs Loni a pran bal 22 jen nan lese frape ak patizan ame Jan Bètran Aristid nan Site Solèy (nò kapital la). Sòlda sa pa pi mal apre l te fin sibi yon operasyon nan lopital Sant Dyagnostik Medsin Avanse nan Sen Domeng.
Lapolis fè konnen gen yon kamarad chèf gang lavalas Dyed Wilme ki mouri anba bal lapolis maten 23 jen an nan katye Dèlma 2 (nò kapital la). Gen plizyè lòt bandi lapolis rive mete anba kòd nan moman operasyon sila.
Yon lòt pa, peyi Espay ak 2 lòt peyi nan amerik la, Ajantin ak Chili ap fè presyon sou peyi ak enstitisyon ki te pwomèt Ayiti lajan nan okazyon gwo konferans ki fèt nan Wachinton lane pase a. Espay menm fè konnen lap retire sòlda li yo nan fòs Loni a si yo pa pran mezi pou debloke lajan sa yo pou lapè ka blayi sou peyi Dayiti.
Nan menm tan sa, zotobre nan Bank Entèamerikèn pou Devlopman vle prete Ayiti 5 milyon dola meriken pou bay bwat leta yo jarèt, se yon reskonsab Biwo BID la ki konfime nouvèl la pandan yon ti pale li te fè nan telefòn ak AlterPresse. Toutfwa, li pat en mezi pou l di kilè akò sila ap siyen ak gouvènman ki la pou yon ti bout tan an. [do apr 24/06/05 13: 00]
Consulter +
