Atik

Kovid : Kouman medsin konvansyonèl ka marye ak medsin tradisyonèl pou ede sove lavi moun an Ayiti ?


samedi 26 juin 2021

Pòtoprens, 26 jen 2021 [AlterPresse] --- Kriz ensekirite ak vyolans akselere an Ayiti nan dènye semèn sa yo, pandan peyi a ap debat nan yon kriz politik ki rete san bout jiskaprezan. Nan moman sa a, kriz sanitè Kovid-19 la ki rebondi depi kèk tan e k ap bay anpil tèt chaje nan peyi a, konplike sitiyasyon an pi rèd.

Ak bilten 21 jen Ministè sante piblik la, nou pase limit 400 moun ki mouri anba maladi a, dapre chif ofisyèl. Menm done sa yo fè konnen gen plis pase 18000 ka konfime. Chak jou gen plizyè dizèn nouvo ka konfime e pafwa se plizyè moun ki mouri nan yon sèl jounen.

Sou fason maladi a ap layite, yo rapòte nou tou yon seri ka kote se yon fanmi antye ki trape maladi a.

Pandan gen pwoblèm konpòtman moun anfas maladi a an Ayiti, gen tou feblès enfrastrikti nan domèn sante ki mare tou ak absans yon politik sante ki adapte pou reponn bezwen Ayisyen ak Ayisyèn yo.

Men, sa pa anpeche refleksyon ap fèt epi espesyalis sante ansanm ak lòt moun oubyen enstiotisyon ak òganizasyon ap pran inisyativ.

Nan kontèks jodi a, kouman medsin konvansyonèl ka marye ak medsin tradisyonèl pou ede sove lavi moun an Ayiti ?

Doktè Patrick Jacques, espeyalis nan medsin natirèl epi chèf sèvis medsin tradisyonèl nan Ministè sante piblik, ak doktè Dieudonné Jean-Baptiste, espesyalis nan medsin fonksyonèl, pote ekleraj pou piblik la.

2 syantifik yo rekonèt pou konpetans yo analize sitiyasyon nan yon edisyon espeyal magazin TiChèzBa sou AlterRadio 106.1 FM. Yo pwopoze pou popilasyon an pran konsyans sou danje maladi a, sitou ak varyan ki devlope kounye a, ki pi mechan pase lòt anvan yo.

Yo bay plizyè metòd pou popilasyon an ranfòse kò li, sitou ak vitamin D epi prensip pou reyaji devan kriz sanitè san parèy k ap vale teren nan peyi a. [gp apr 26/06/2021 10:00]