Haiti
Atik

Ayiti-Jistis : Palè nasyonal vle anpeche dosye kò sasinay sou mèt Monferrier Dorval la vanse kòmsadwa, dapre Rezo nasyonal k ap defann dwa moun yo


Ekri jou lendi 21 jen 2021

Pòtoprens, 21 jen 2021 [AlterPresse] --- Se palè nasyonal, ki dèyè desizyon alatèt lapolis nasyonal d Ayiti a pran, pou retire zam, ki te nan men polisye nasyonal, k ap asire sekirite jij enstriksyon Renord Régis, ki anchaje travay sou dosye mèt Monferrier Dorval, dapre Rezo nasyonal k ap defann dwa moun yo (Rnddh), nan yon entèvyou li bay AlterRadio/AlterPresse.

Rnddh fè konnen desizyon sa a, se yon fason pou mete jij la, nan yon sitiyasyon ensekirite, pou dosye kò sasinay sou mèt Monferrier Dorval la pa vanse kòmsadwa.

Bandi ak zam te sasinen batonye Pòtoprens la, vandredi 28 dawout 2020 an, nan Pèlren 5, pa twò lwen kote Jovenel Moïse rete.

Direktè egzekitif Rnddh la, Pierre Esperance, fè sonje direksyon lojistik lapolis la pran dezisyon sa a, nan dat 17 jen 2021 an, ki se jou jij la te gen pou tande madanm Jovenel Moise la, Martine Joseph, nan kad dosye sa a.

Rezo nasyonal k ap defann dwa moun yo swete pou popilasyon an leve kanpe, pou pèmèt ansyen batonye lòd avoka Pòtoprens lan jwenn jistis.

Desizyon sa a mete lavi jij enstriksyon Renord Réjis an danje, daprè pòtvwa Kolektif avoka k ap defann dwa moun yo (Caddho), mèt Arnel Remy, ki mande Konsèy siperyè pouvwa lajistis la (Cspj) ak divès lòt asosiyasyon majistra-jij yo pran pozisyon kont desizyon lapolis la.

Desizyon, pou retire zam, nan men polisye nasyonal k ap asire sekirite jij enstriksyon Renord Régis, plis desizyon pakè tribinal sivil Pòtoprens pran, ki derefize ekzekite òdonans jij la, montre aklè dosye kò sasinay, sou mèt Monferrier Dorval la, se yon dosye politik. Se dizon Sektè demokratik ak popilè a (Sdp).

Jij Renord Régis te voye yon korespondans bay Cspj, pou fè l konnen desizyon Lapolis la. [apr 21/06/2021 09:45]