Haiti
Atik

Ayiti-Ensekirite : Gwoup Boulos leve vwa l, kont zak vyolans, gang ak zam yo, 14 jen 2021 an, sou plizyè biznis, tankou lokal konpayi Behrmann Motors


Ekri jou jedi 17 jen 2021

Pòtoprens, 17 jen 2021 [AlterPresse] --- Gwoup Boulos leve vwa l, kont zak vyolans, gang ak zam te fè, nan dat lendi 14 jen 2021 an, sou wout aryopò entènasyonal Pòtoprens lan, kote yo te atake plizyè biznis prive, tankou konpayi lavant machin Behrmann Motors, nan yon nòt, ki pote siyati biznisman, Pierre Réginald Boulos, ki vin jwenn AlterPresse.

Li denonse kalte zak sa yo, ki pa ankouraje, dapre li, moun ni envesti ni bay travay nan peyi a.

Lapolis nasyonal d Ayiti te fè konnen li te rive fè soti kliyan ak anplwaye plizyè biznis sa yo, ki te viv yon moman difisil nan zòn nan, kote gang ak zam yo t ap fè bal chante.

Lapolis nasyonal te pèmèt yo reprann kontwol sitiyasyon an epi ede sikilasyon machin fèt, sou wout aryopò entènasyonal Pòtoprens lan.

Gouvènman defakto an dwe bay lavi moun ak byen priyorite, dapre Gwoup Boulos.

Ganranti sekirite tout sitwayèn ak sitwayen, se responsabilite otorite yo, an jeneral, ak lapolis, espesyalman. [jep emb rc apr 17/06/2021 10:00]