Haiti
Atik

Ayiti-Lasante : Monseyè Ducange Sylvain, nan legliz katolik women, mouri, madi maten 8 jen 2021 an, anba maladi kowona an


Ekri jou mèkredi 9 jen 2021

Pòtoprens, 9 jen 2021 [AlterPresse] --- Legliz katolik women nan peyi d Ayiti an dèy : monseyè Ducange Sylvain mouri, ak 58 lane sou tèt li, madi maten 8 jen 2021 an, anba maladi kowonaviris la, nan lopital Mibalè, dapre enfòmasyon ki vin jwenn ajans AlterPresse.

Ducange Sylvain te monseyè oksilyè Pòtoprens, depi lane 2016. Se te nan dat 8 jiyè 1995 li te vin pè pou kongregasyon salezyen Don Bosco.

Nouvèl lanmò sa a plonje nan gwo doulè tout legliz la, estrikti legliz katolik women Pòtoprens la, kongregasyon salezyèn Don Bosco a ak fanmi monseyè Ducange, dapre yon nòt legliz katolik women nan peyi d Ayiti mete deyò.

Rektè Inivèsite episkopal peyi d Ayiti, doktè Lucien Jean Bernard, rann dènye souf li tou, madi 8 jen 2021 an, nan yon sant ki bay moun, ki trape maladi kowona an, swen.

Maladi Kovid-19 lan sa a te deja pote ale, mèkredi 2 jen 2021 an, rektè an apre Inivèsite episkopal d Ayiti a, doktè Robert Joseph.

Lopital advantis Dikini fè konnen li p ap kapab resevwa, ankò, moun ki trape maladi kowonaviris la ankò, paske inite trètman enfeksyon, sou pwoblèm moun ki pa ka respire byen, deja plen, epitou yo pa gen ase oksijèn, akoz wout Matisan an bloke depi plizyè jou.

Sa gen kèk jou, se te lopital Saint-Luc ak lopital kanapevè ki te anonse yo pa kapab resevwa moun ki gen kowona ankò, paske yo rive nan limit yo.

Gen plis pase 16 mil moun, ki trape maladi kowonaviris la nan peyi d Ayiti, ant jedi 19 mas 2020 pou rive koumansman mwa jen 2021 an, daprè dènye ranmase, nan dat 8 jen 2021 an, Ministè sante piblik ak popilasyon (Mspp). [jep emb rc apr 09/06/2021 09:05]