Pòtoprens 7 jen 2021 [AlterPresse] --- Atak miltipliye sou pòs polis, nan plizyè katye nan kapital la, bandi achte lajan kontan nan finisman premye semenn mwa jen 2021 an, pandan yon bann fanmi blije abandone kay yo, pou al refijye yo nan lari, epi enkyetid ak laperèz ogmante divès kote nan peyi a, san otorite yo pa rive tabli kè poze, dapre enfòmasyon ajans AlterPresse ranmase.
Lese frape ant gang oubyen ant lapolis ak gang lage gwo tèt chaje, nan divès katye, nan sid Pòtoprens, tankou Matisan, Fontamara, ak nan nò kapital la, tankou Site Solèy, Lasalin, Ba Dèlma, Bèlè, elatriye.
Vyolans sa yo ta lakòz omwen yon dizèn moun ta mouri, pami yo 4 polisye nasyonal. Anpil kay ak biznis boule oubyen sakaje, dapre obsèvasyon ki fèt.
Pou jounen 7 jen 2021 an, plizyè responsab biznis, ki twouve yo nan zòn vyolans yo, fè konnen y ap fèmen pòt yo. Gen konpayi avyon entènasyonal, ki fè konnen yo annile vòl, yo te prevwa fè sou Pòtoprens pou jounen an.
Lannuit samdi 5 jen 2021 an, nan yon atak sou pòs polis Dwouya, nan komin Site Solèy, bandi ak zam, lapolis poko rive idantifye, touye ak bal enspektè polis Mirabel Adolphe.
Menm aswè 5 jen 2021 an, nan yon atak yo fè sou pòs polis ki nan estasyon Gonayiv, nan Pòtoprens, pa twò lwen Site Solèy, bandi ak zam blese ak bal polisye nasyonal Luc Fedlin.
Plizyè gwoup avoka ak Kolektif avoka k ap defann dwa moun yo (Caddho), ansanm ak anpil moun, ki viktim nan atak gang ak zam ap fè, depi madi premye jen 2021 an, pote plent kont direktè jeneral lapolis la, Léon Charles, minis defakto enteryè a, Louis Gonzague Day, ak minis defakto lajistis la, Rockfeller Vincent, poutèt yo pa pote asistans bay moun Matisan, ki kouri kite kay yo, al pran refij sou plas Fontamara, akòz gang ak zam k ap lese frape, nan sid Pòtoprens lan.
6 jou apre gang ak zam tabli yon klima laterè, nan Matisan ak Fontamara, san lapolis pa fè anyen pou kwape yo, gouvènman defakto a, detan l deklare li konnen ki men ki kache dèyè zak bandi sa yo, pwomèt ankò, dimanch 6 jen 2021 an, l ap rive sou tout moun, k ap kreye latwoublay nan peyi a.
Popilasyon an pa manke kritike atitid otorite yo. Yo ekri dirèkteman, anba pòs yo fè sou rezo sosyal yo, pou kritike mepri otorite yo montre epi pou akize yo kòmkwa yo nan konfyolo ak bandi yo.
Senatè Youri Latortue leve lavwa kont klima laterè, gang ak zam blayi, depi premye jen 2021 an, nan zòn Fontamara ak Matisan, kote timoun kou granmoun viktim anba bal, lajounen kou lannuit
Zak vyolans nan Matisan ak Fontamara yo, gang ak zam ap simen, depi madi premye jen 2021 an, se yon gwo malè pandye sou tèt peyi a. Se dizon Ofis pwoteksyon sitwayèn ak sitwayen, ki di li gen gwo kè sote sou degenn gang ak zam yo, nan divès katye.
Òganizasyon nasyonzini nan peyi d Ayiti fè konnen li gen gwo tèt chaje, sou konsekans zak vyolans gang ak zam yo ap plede simaye sou popilasyon sivil nan peyi a, nan moman maladi kowona an ap gaye sou teritwa nasyonal la.
Nan sitiyasyon deblozay sa a, kriz politik la toujou rete mangonmen, alòske pouvwa a kontinye kenbe dat 27 jen 2021 pou fè yon referandòm, pou chanje Konstitisyon peyi a, yon referandòm yon bann sektè rejte.
Lavèy rive, nan peyi d Ayiti, yon delegasyon Òganizasyon leta ameriken (Oea), plizyè estrikti politik, pati politik ak òganizasyon politik deklare yo siyen yon akò, pou rezoud kriz, k ap brase bil peyi a. Yon akò, ki voye jete tout fòm mare sosis oswa konfyolo ak ekip defakto an, ki dappiyanp peyi a depi 7 fevriye 2021 an, dapre sa yo di.
Pati politik Pitit Desalin di li pa asepte envitasyon Òganizasyon Leta ameriken (Oea) voye ba li, pou ta vin patisipe nan yon swadizan chita pale, pou ta chèche jwenn yon solisyon nan kriz, k ap brase bil peyi d Ayiti a. [apr 07/06/2021 06:00]
Foto : Imaj ki soti nan rezo sosyal yo
Consulter +
