Pòtoprens, 17 me 2021 [AlterPresse] --- Otorite dominikèn yo remèt Woodly Etheart, yo pliskonnen sou non Sonson La Familia, bay Lapolis an Ayiti, jou ki te dimanch 16 me 2021 an, dapre sa Lapolis fè konnen, nan yon nòt li pibliye sou paj Fesbouk li, ajans AlterPresse te gade.
Etheart, Lajistis t ap chèche, jwenn arestasyon l samdi 15 me 2021 an, nan zòn Boca Chica, Repiblik Dominikèn.
« Yo t ap chèche Sonson La Familia, depi lane 2019, apre Lakou Kasasyon peyi d Ayiti te pran yon desizyon, nan mwa me 2018, kont li, lè l te mande pou yo retounen Woodly Etheart nan prizon, yon fason pou l rejije devan tribunal kriminel, pou zak yo reproche l, tankou kidnapín, blanchiman lajan, kidonk sèvi ak lajan sal, trafik dwòg, asosyasyon malfektè’», dapre sa Lapolis fè sonje.
Pou kounye a, Woodly Etherat nan Direksyon santral Lapolis jidisyè (Dcpj), an atandan responsab yo voye l douvan tribinal.
Lapolis Repiblik Dominiken di li arete, sou wout Boca Chica a, Woodly Etheart, yo plis konnen sou non Sonson La familia, ansanm ak 7 lòt moun.
Depi nan lane 2015, non Woodly Ethéart ap site kòm youn responsab gang « galil » nan peyi d Ayiti.
Anpil laviwonn fèt nan lajistis peyi d Ayiti, sou dosye Woodly Ehéart ak Renel Nelfort, gang galil, yo akize kòm moun ki mele nan zak « kidnaping, trafik dwòg, blanchiman lajan, ki vle di sèvi ak lajan sal, asosyasyon malfektè ». [jep emb rc apr 17/05/2021 10:00]
Consulter +
