<

Ayiti-Kriz : Opozisyon an voye jete demann chita pale pouvwa defakto a, pou mete kanpe yon gouvènman inyon nasyonal

Pòtoprens, 13 me 2021 [AlterPresse] --- Se pa yon gouvènman inyon nasyonal, ki priyorite peyi a jodi a, dapre pati politik Mouvman pou transfòmasyon ak revalorizasyon Ayiti a (MtvAyiti).

MtvAyiti voye jete demann chita pale gouvènman defakto a, fè bay opozisyon an.

Nan yon piblikasyon li fè sou twitè, dirijan MtvAyiti, Doktè Réginal Boulos fè konnen se ‘’referandòm chanpwèl’’, prezidan de fakto Jovenel Moïse lan, ki pou anile.

Li mande gouvènman an kraze konsèy elektoral pwovizwa a, li konsidere kòm yon estriti ki depaman ak lalwa.

Yon depa nan lòd prezidan defakto a ka pèmèt gen kè poze nan peyi a ak bon jan demokrasi, dapre sa li esplike.

Popilasyon an gen tan fè plizyè mouvman kont pwojè referandòm lan ak eleksyon yo, gouvènman de fakto a prevwa fè, lane sa a, nan peyi an.

Opozisyon an kontimye mande Jovenel Moïse kite pouvwa a, paske manda l bout depi 7 fevriye 2021 an.

Direksyon politik opozisyon demokratik la (Dirpod) voye jete dènye demann chita pale gouvènman defakto a, ki ta swete opozisyon an ede l mete kanpe yon gouvènman inyon nasyonal nan peyi d Ayiti.

Dirpod denonse pouvwa defakto a, k ap chachè jwenn yon antann ak yon ti gwoup, nan lide pou fòme yon gouvènman ki pa gen lòt objetif pase tabli yon regim bout di nan peyi a.

Danio Siriack, ki se pòt pawòl pati politik Òganizasyon pèp k ap lite(Opl), ki t ap pale nan non Dirpod, fè konnen batay opozisyon an kont pouvwa defakto a p ap kanpe nan wout. Objektif la, se fòse Jovenel Moïse kite pouvwa a, pou remèt peyi a bay yon gouvènman tranzisyon.

Opl pwofite denonse yon gwoup moun, li konsidere tankou vagabon politik, ki mete non kòdonatè jeneral pati Opl la, ansyen senatè Edgard Leblanc Fils, nan lis moun, yo ta chwazi pou vin premye minis defakto, nan yon gouvènman inyon nasyonal.

Danio Siriack fè konnen pati Opl p ap patispe nan okenn gouvènman ak pouvwa defakto, ki la a. [jep emb rc apr 13/05/2021 12:40]