Pòtoprens, 6 me 2021 [AlterPresse] --- Lapolis fè konnen li arete, mèkredi 5 me 2021 an, plis pase 25 moun, ii sispèk ki ta nan zak kidnapin, nan katye popilè « Chavez », komin Kafou (nan sid kapital la), dapre sa ajans AlterPresse li sou paj Facebook lapolis la.
Bandi ak zam sanble ta pran katye sa a kòm yon zòn pasaj, pou mennen moun yo kidnape yo, kote yo pral kenbe yo a, dapre lapolis.
Pi fò nan moun, lapolis arete yo a, te deja gen manda oubyen lapolis t ap chèche yo, poutèt yo ta patisipe nan zak kriminèl.
Pou youn nan ra fwa sa rive, yon operasyon lapolis nasyonal, nan Kanaan 50, te pèmèt yo lage, lendi 3 me 2021 an, doktè Jenny Edouard Pierre-Lys ak pitit gason l Noah Sacha Pierre-Lys, bandi ak zam te kidnape, samdi premye me 2021 an, nan Maren, laplenn, nan nò Pòtoprens.
Detan l rekonèt se pa tout moun, ki gen inifòm polis, ki se polisye, direktè jeneral pou yon bout tan lapolis la, Léon Charles, pwomèt lapolis la toujou rete mobilize, pou fè fas kare ak zak kidnaping yo.
Yon lòt fwa ankò, gouvènman defakto an deklare li pran bon jan dispozisyon pou kwape zak kidnaping yo, li met sou do moun ki vle fòse Jovenel Moïse, ki gen manda l fini, depi 7 fevriye 2021 an, kite pouvwa a. [emb rc apr 06/05/2021 16:20]
Consulter +
