Haiti
Atik

Ayiti-Dwa moun : Plizyè sitwayen rele chalbare dèyè yon seri otorite, nan yon mès legliz katolik women, dimanch 25 avril 2021 an, nan Sen Mak


Ekri jou lendi 26 avril 2021

Sen Mak (Ayiti), 26 avril 2021 [AlterPresse] --- Dimanch maten 25 avril 2021 an, plizyè jenn gason te menase bloke mès legliz katolik women nan Senmak, depatman Latibonit, pou pwoteste kont prezans yon seri otorite, tankou direktè Lapolis la, Léon Charles, yo konsidere ki pa t dwe la, akoz klima laterè an, k ap taye banda nan sosyete a, dapre enfòmasyon ki vin jwenn ajans sou entènèt AlterPresse.

Dènye tan sa yo, bandi ak zam kontinye ap kidnape plizyè moun, san gade dèyè, nan peyi a, sitou nan zòn metropoliten Pòtoprens lan.

Samdi 24 avril 2021 an, bandi ak zam kidnape pwofesè fakilte metsin ak famasi inivèsite Leta d Ayiti an, Marie Josette Malvoisin, detan li t ap soti nan fakilte medsin ak famasi an, nan Pòtoprens.

Jodi lendi 26 avril 2021 an, moun Nazon, nan Pòtoprens, boule kaoutchou, pou mande bandi ak zam lage yon responsab ponp gaz, yo kidnape.

Yon lòt bò, detan yo kontinye ekzije bandi ak zam 400 mawozo yo lage tout 6 lòt moun, yo kidnape, depi dimanch 11 avril 2021 an, alatèt legliz katolik women yo mande tout enstitisyon manm li yo, tankou lekòl ak inivèsite, reprann travay yo, apre 3 jou pwotestasyon, ant mèkredi 21 pou rive vandredi 23 avril 2021 an.

Bandi 400 Mawozo yo te lage, aswè jedi 22 avril 2021 an, 3 nan 9 moun, yo te kontinye kenbe, apre kidnapin yo te fè nan Kwadèboukè, dimanch 11 avril 2021 an. [jep emb rc apr 26/04/2021 09:30]