Ayiti : Pòtoprens prèt pou tounen yon vil danje

Pòtop., 20 jen. 05 [AlterPresse] --- Jou an jou, Pòtoprens, kapital peyi d Ayiti, ap tounen yon vil danje pou moun k ap viv ladan. Popilasyon ayisyen nan kapital la, ki santi l dezame, gen gwo enkyetid sou vitès vyolans lan ap pran nan jou sa yo an Ayiti.

Plizyè katye Pòtoprens, kapital peyi d Ayiti, devni zòn entèdi avèk aktivite gang k ap blayi toupatou. Divès sitwayèn ak sitwayen ap kouri kite kote yo te rete, pou al viv nan lòt katye ki ta gen mwens tansyon.

Rezo nasyonal k ap defann dwa moun denonse sitiyasyon latwoublay k ap devlope nan katye ki nan sid kapital la, kote gen batay ant gang. Pami manm gang sa yo, òganis dwa moun nan site non omwen 2 moun lajistis sispèk ki ta patisipe nan asasinay ansyen direktè Radyo Ayiti a Jan Dominik. Jisteman, vandredi 10 jen 2005, bandi ak zam yo, ki t ap tire anpil kote, ekzekite 3 jenn gason nan yon katye nan sid Pòtoprens.

Malgre divès pwomès ki fèt, otorite peyi a poko rive montre aklè ki dispozisyon fèm yo pran kont zak vyolans k ap ogmante chak jou nan kapital la.

Bandi ak zam yo komèt anviwon 200 zak kidnaping epi asasinen divès kalite moun soti mwa mas rive mwa jen 2005. Pou vandredi 10 jen 2005 sèlman, omwen 10 moun viktim nan kidnaping.

Samdi maten 11 jen 2005, bandi ak zam te eseye kidnape direktè jeneral Radyo Metwopòl Richard Widmaier ki te rive sove. Nan yon premye tan, bandi yo te ale ak machin li te ladan an. An apre, yo vin rejwenn machin direktè radyo Metwopòl la sou wout Dèlma.

Pami viktim kidnaping yo, gen 2 responsab Famasi Vital Herne, yon famasi ki gen esperyans nan prepare divès kalite medikaman depi plizyè dizèn ane. Gen tou, youn nan responsab yon òganizasyon k ap travay ak jèn nan peyi a, yo te rive lage apre kout fòs lajan yo te ba yo.

Tansyon an te monte byen wo avèk gwo kout zam lou ki t ap chante nan divès katye. Kout zam yo te menm rive toupre Palè Nasyonal nan dat 10 jen.

Lapolis nasyonal te reyisi antre, menm jou a, nan kèk katye cho, kote yo arete plizyè moun yo ta sispèk ki nan aktivite gang.

Ak konkou polis nasyonal la, polis sivil MINISTA a te rive libere vandredi 10 jen yon gwo fonksyonè Leta kidnapè yo te mennen nan ri Sen Maten, zòn Nòdwès Pòtoprens, toupre Belè. Yo te fè 2 arestasyon.

Depi koumansman mwa jen 2005 la, MINISTA tanmen aksyon nan Site Solèy pou wè si yo ka met men sou Emmanuel Wilme, ki gen non l site nan divès zak, pami yo asasinay mèkredi 8 jen komèsan endistriyèl Jean Paul Medina.

Kounye a, MINISTA mete yon nimewo telefòn, kote moun ki wè oswa ki gen enfòmasyon sou bandi ak zak y ap fè kapab rele pou mete yo okouran.

De ki prevyen bò kote kominote entènasyonal la?

Plizyè peyi, ki deklare tèt yo zanmi Ayiti, di yo soutni gouvènman pwovizwa a nan dispozisyon li dwe pran pou konbat zak vyolans, espesyalman nan kapital la. Nan finisman semenn 10 jen an, Lapolis Nasyonal ak MINISTA te koumanse yon seri operasyon pou eseye retabli sekirite nan kapital la.

Devan klima kè sote sa a, peyi Etazini, Lafrans ak Kanada voye yo chak yon delege, nan mitan 2 zyèm semenn mwa jen 2005 la. Mesay yo te pote, se pou gouvènman pwovizwa a degaje l fè sekirite a retounen anvan eleksyon ki prevwa pou finisman ane 2005 la.

Jiska prezan, anyen pa klè sou posiblite pou « marines » ameriken ta vin pote kole nan aksyon pou ranfòse sekirite nan kapital la.

Sèlman, anbasad Etazini nan kapital la remèt bay Polis nasyonal la, nan finisman semenn 10 jen an, yon lo materyèl, òdinatè, machin ak zam. Pòtpawòl polis nasyonal la Jesi Kamo Kwakou regrèt machin sa yo se gazolin yo konsome, alòske pri gazolin lan rive nan nivo 150 goud galon, apeprè 4 dola ameriken konsa.

Sitwayen peyi etranje, ki pral pran avyon nan aryopò entènasyonal Pòtoprens la, gen konsiy monte nan machin blende pou yo pa resevwa katouch, dapre nouvèl k ap sikile nan Pòtoprens. Yon moun ki ta deside lwe yon machin blennde pou mennen l nan aryopò entènasyonal ta gen pou peye 175 dola ameriken, dapre sa k ap pale nan kapital ayisyen an.

Antretan, dirijan politik yo te mande Juan Gabriel Valdes, reprezantan sekretè jeneral nasyon zini an Ayiti, bay presizyon sou responsab politik, li di, ki t ap prepare konplo pou atake manm MINISTA ak Polis nasyonal la.

Valdes poko bay okenn presizyon sou dirijan politik sa yo li kwè k ap marinen konplo ak zam yo.

Anpil moun ap mande èske se sou patizan lavalas yo misye t ap pale. Alatèt gang nan Site Solèy ak Belè toujou fè konprann se pou ansyen rejim lavalas la y ap mennen zak laterè yo simen nan kapital la depi septanm 2004.

Nan yon reyinyon vandredi 10 jen 2005 ak plizyè pati politik, Premye Minis Jera Latòti anonse gouvènman l ap dirije a pral aji pou retabli sekirite nan kapital la. Latòti te tou pwofite di li p ap bay talon l, jan kèk pati politik swete sa. [rc apr 20/06/2005 14:30]