Pòtoprens, 18 avril 2021 [AlterPresse] --- Koumansman semenn sa a, anviwonman peyi d Ayiti an bonbade ak pousyè, ki soti nan zòn Sahara, nan Nò peyi Afrik yo, plis sann, ki soti nan vòlkan Lasoufriyè, ki sou brenzeng, depi vandredi 9 avril 2021 an, sou zile Sen Vensan ak Grenadin yo, dapre enfòmasyon ajans sou entènèt AlterPresse ranmase.
Akoz pousyè sab Sahara sa yo, plis sann vòlkan Lasoufriyè sa a, ki sou brenzeng depi vandredi 9 avril 2021 an, pwoteksyon sivil nan peyi d Ayiti mande tout moun evite espoze tèt yo twòp deyò, mete mas ak linèt ki ka pwoteje je yo, mete tou chapo oswa kepi, nan tèt, jis rive mèkredi 21 avril 2021 an.
Nan ki kondisyon tan an ye?
Pa gen twòp boulvès nan tan an, ki sèk sou peyi Karayib yo.
Peyi d Ayiti, limenm, anba gwo kout van, pandan jounen an.
Gen solèy, nan maten.
Nyaj yo ap plis parèt, nan finisman apremidi.
Gen posiblite ti aktivite lapli, sou depatman Latibonit ak Plato santral, nan finisman apremidi ak aswè.
Lannuit yo, gen zetwal ak moso lalin, tankou nou wè sa, depi plizyè aswè.
Soti nan 32 degre Sèlsiyis, tanperati an va desann, ant 23 pou al 20 degre Sèlsiyis.
Kaptenn bato, chaloup, bwa fouye yo, dwe pran prekosyon sou lanmè an, k ap move anpil, bò tout kòt peyi d Ayiti yo.
Vag yo ap monte nan nivo 8 pye wotè bò kòt Sid yo, 6 pye wotè bò kòt zile Lagonav yo, pa twò lwen Pòtoprens, ak 5 pye wotè bò kòt Nò yo. [rc apr 18/04/2021 15:00]
Consulter +