Haiti
Atik

Ayiti-Klima laterè : Plizyè fidèl pran nan gaz lakimojèn Lapolis nan legliz Sen Pyè, yon machin Nissan patrol boule, nan finansman yon mès, 15 avril 2021 an, kont kidnaping


Ekri jou jedi 15 avril 2021

Pòtoprens 15 avril 2021 [AlterPresse] --- Jedi 15 avril 2021 an, Lapolis gaye yon mouvman, plizyè militan politik t ap fè bò plas legliz katolik women Sen Pyè, Petyonvil, pou mande prezidan defakto a Jovenel Moïse kite pouvwa a, dapre sa AlterRadyo/AlterPresse obsève.

Mouvman sa a te fèt, nan finansman yon mès, nan legliz katolik women Sen Pyè, Petyonvil, pou denonse zak kidnaping nan peyi d Ayiti.

Nan moman leve kanpe sa a, manifestan yo te mete dife nan yon machin Nissan patrol koulè blanch, ki gen yon ansyen plak ofisyèl OF 00452. Sa ki ta pral pouse polisye nasyonal, ki te prezan nan espas la, voye gaz lakimojèn pou gaye foul la.

Gaz lakimojèn lapolis lan lakoz plizyè fidèl te gen difikilte pou respire, andedan kou deyò legliz Sen Pyè a, nan Petyonvil, nan finansman mès ki t ap fèt kont zak kidnaping yo.

Konferans monseyè katolik women ayisyen yo te mande tout legliz katolik, nan tout dis depatman peyi a, òganize mès lapriyè espesyal sa a, pou jwenn delivrans peyi a anba men kidnapè san fwa ni lwa yo.

Nan prèch li fè an, monseyè Launey Saturné, ki responsab legliz katolik women Okap, mande otorite yo mete bout nan zak kidnapin bandi ak zam yo, nan peyi d Ayiti.

Mès espesyal lan, nan legliz katolik women Sen Pyè, Petyonvil, fèt douvan divès pèsonalite nan klas politik la, tankou ansyen senatè Youri Latortue ak Jean Renel Sénatus, pòtvwa sektè demokratik popilè a, Mèt André Michel, defansè dwa moun, Pierre Esperance ak sendikalis Duclos Benisoit. [kap emb rc apr 15/04/2021 16:05]