Ayiti-Politik : 15 moun sou 17, ekip defakto an te akize nan swadizan koudeta 7 fevriye 2021 li an, lage 26 mas 2021, sou 48 jou prizon, apre desisyon Lakou dapèl Pòtoprens lan

Pòtoprens, 29 mas 2021 [AlterPresse]--- 12 gason ak 3 fanm sou 17 moun, ekip defakto an te akize nan swadizan koudeta 7 fevriye 2021 li an, lage, apremidi vandredi 26 mas 2021 an, apre 48 jou fèmen nan prizon, san rezon, dapre enfòmasyon AlterPresse rasanble.

Moun sa yo jwenn liberasyon yo, 2 jou apre òdonans 24 mas 2021 Lakou dapèl Pòtoprens lan, ki konsidere desizyon arestasyon yo ak fèmen yo nan prizon te pran dèyè do Konstitisyon an ak Lalwa.

Roosevelt Cinéus, 33 lane, ki se kouzen jij lakou kasasyon Yvickel Dabrézil, poko lage, poutèt non l pa t sou lis demann, ki te ale douvan lakou dapèl Pòtoprens lan. Jènn fanm Hija Djennicka Philippe, 21 lane, poko lage, poutèt gen yon fot nan non, prizon pou fanm Kabarè an te enskri l lan.

Men lis 12 gason, yo lage apremidi 26 mas 2021 an, nan prizon sivil Kwadèboukè an :

1. Renard Dabrézil, 35 lane, kouzen jij Lakou Kasasyon Yvickel Dabrézil ;

2. Romain Dabrézil, 35 lane, kouzen jij Lakou Kasasyon Yvickel Dabrézil ;

3. Steven Herard, 34 lane, Ajan 3 Lapolis nasyonal d Ayiti, ki anchaje sekirite majistra Yvickel Dabrézil ;

4. Nacius Fleirant, 36 lane, Ajan 2 Lapolis nasyonal d Ayiti ;

5. Dachelin St-Ford, 25 lane, Ajan 1 Lapolis nasyonal d Ayiti ;

6. Robenson Jean, 29 lane, Ajan 1 Lapolis nasyonal d Ayiti ;

7. Louis Buteau, enjenyè agwonòm ;

8. Claude Veillard, 75 lane, sosyològ ;

9. Bertis Loubert, 58 lane ;

10. Wesner Dantes, 45 lane ;

11. Fritnet Saint Cyre, 40 lane, ki se chofè jij Yvickel Dabrézil ;

12. Wany Yves, 44 lane, yon anplwaye nan Bitasyon Ti Bwa ;

3 fanm yo lage, nan prizon pou fanm Kabarè an, se ; Marie Louise Gauthier, enspektris jeneral Lapolis nasyonal d Ayiti ; Marie Antoinette Gauthier, ki se yon doktè ak Chantale Saintime, 37 lane.

Moun, yo poko lage yo, se : Roosevelt Cinéus, 33 lane, kouzen jij Yvickel Dabrézil (ki toujou nan prizon Kwadèboukè) ak Hija Djennicka Philippe, 21 lane (ki toujou nan prizon pou fanm Kabarè an)

Se jedi 11 fevriye 2021, lajistis te lage jij lakou Kasasyon Yvickel Dabresil apre 5 jou fèmen nan prizon, dèyè do Lalwa. [jep emb rc apr 29/03/2021 10:40]