Pòtoprens, 22 mas 2021 [AlterPresse] --- Jounen lendi 22 mas 2021 an, avoka fanmi polisye, gang te sasinen, vandredi 12 mas 2021 an, nan Village de Dieu an, ap pote plent, douvan kabinè enstriksyon, kont tout moun ki nan wo kòmannman Lapolis lan ak kont tout moun, ki patisipe nan masakre polisye nasyonal yo, dapre enfòmasyon AlterPresse rasanble.
Pèsonn pa ka asepte pou polisye nasyonal mouri nan kondisyon konsa epi pou otorite nan Lapolis lan, san ankenn wont, al negosye ak bandi, pou rekipere yon cha blennde, bandi ak zam yo te sezi pandan operasyon rate nan Village de Dieu an, aloske menm otorite sa yo pa di anyen pou kò polisye yo, ki rete anndan vilaj lan, dapre Michel André, youn nan avoka fanmi polisye sa yo.
Pa gen okenn negosyasyon ki te fèt ak gang Village de Dieu an, pou n te jwenn blennde a. Se sa direktè jeneral Lapolis la, Léon Charles, deklare, 17 mas 2021 an, nan aswè.
Michel André te tou pwofite anonse mobilizasyon yo ap reprann dimanch 28, lendi 29 ak madi 30 mas 2021 an, k ap vini yo, pou kontinye egzije respè Konstitisyon an, men tou pou pote sipò bay polisye yo, ki genyen yon pakèt revandikasyon, otorite yo pa satisfè.
Rony Timothé, you nan manm sektè demokratik ak popilè an, kontinye leve lavwa kont konpòtman alatèt Lapolis nasyonal lan, ki toujou pa fè ankenn demach, depi vandredi 12 mas 2021 an, pou al pran kò polisye, ki mouri anndan Village de Deu an, nan kad operasyon rate yo t al mennen an.
Li pa konprann poukisa anpil moun, nan wo etamajò Lapolis lan, pa bay demisyon yo, apre operasyon rate 12 mas 2021 an, nan Village de Dieu an.
Sektè demokratik ak popilè an pa konprann, non plis, kouman fè se sèl enspektè Carl Henry Boucher yo tande sou dosye sa a, jis koulye a, alòske yo pa janm konvoke direktè jeneral pou yon bout tan nan Lapolis lan, Léon Charles, ak tout lòt moun, ki te patisipe nan prepare plan operasyon an. [jep emb rc apr 22/03/2021 10:10]
Consulter +
