Pòtoprens, 22 mas 2021 [AlterPresse] --- Yon misyon legliz pwotestan, ki rele Misyon legliz Bondye sous revèy, òganize, dimanch 21 mas 2021 an, yon mach levanjil ak pou lapè, sòti Fontamara 43 rive Village de Dieu, kote y al fè yon seyans priyè, dapre enfòmasyon ajans sou entènèt AlterPresse ranmase.
Se plizyè dizèn moun, espesyalman kretyen levanjil. ki te patisipe nan mach lan, avèk pankat nan men yo, ki te genyen divès pawòl, tankou : « Jezi se sèl solisyon 3zyèm nan ak Ayiti. Ou menm k ap gade a, Bondye ap rele w. Lè a rive tout bon pou Bondye beni Ayiti ».
Pandan tout pakou an, yo t ap mande lapè pou Gran ravin ak Village de Dieu an. Kèk nan yo te reyisi antre anndan vilaj lan. Yo te rive bò lanmè an. Se la tou yo ta pral fè kèk minit lapriyè, anvan yo te kase tèt tounen.
Nan moman mach sa a, ki te fèt san prezans Lapolis nan zòn nan, pa t gen kout zam ki te tire.
Yon lòt bò, plizyè moun, ki rete nan Dèlma 32, manifeste, dimanch 21 mas 2021 an, nan divès ri nan Pòtoprens, pou kontinye mande kò polisye Vivender Georges, ki te mouri sasinen, vandredi 12 mas 2021 an, anba men gang ak zam, nan operasyon rate Lapolis, nan Village de Dieu an.
Ak plizyè pankat nan men yo, manifestan yo te profite mande jistis anfavè tout viktim yo, nan trajedi vandredi 12 mas 2021 an, nan Village de Dieu an.
Plizyè dizèn moun, ki t ap pwoteste, ak rad koulè nwa ak blan sou yo, te soti nan Dèlma 32, epi pran direksyon lokal direksyon jeneral Lapolis nasyonal d Ayiiti an, ki chita nan Klèsin.
Plizyè ajan nan Lapolis lan te gaye foul la ak gaz lakrimojèn. Manifestan yo te blije kase tèt tounen epi fini manifestasyon an nan Dèlma 32. [jep emb rc apr 22/03/2021 09:45]
Consulter +
