Monreyal, 16 jen 05 [AlterPresse] --- Reyinyon, k ap fèt Monreyal 16 ak 17 jen 2005 la sou Ayiti a, ap rasanble plis pase yon douzèn peyi ak enstitisyon entènasyonal.
Lèzetazini, Lafrans, Lalmay, Chili, Ajantin, Brezil, Meksik ak sèten peyi manm kominote ekonomik karayib yo (Karikòm), Repiblik Dominikèn, reponn prezan, daprè enfòmasyon nou jwenn nan ministè Zafè etranjè peyi Kanada.
Patwon Nasyon Zini a an Ayiti, Juan Gabriel Valdès, limenm tou prezan ansanm ak on latriye à’ganizasyon entènasyonal, espesyalman enstitisyon entènasyonal ki prete lajan oubyen bay don.
Se minis zafè etranjè gouvènman pwovizwa a, Hérard Abraham, ki nan tèt delegasyon ayisyèn nan. Li gen avèk li minis Ekonomi ak finans la, Henri Bazin, avèk minis Planifikasyon ak kowoperasyon an, Roland Pierre.
Delegasyon ki sòti Ayiti a gen ladan li tou manm Konsèy Elektoral Pwovizwa a.
Reyinyon Monreyal plis pase yon rankont ekonomik. Pandan tout jounen 16 jen an, se sou zafè eleksyon diskisyon yo tabli. Patisipan yo ap reflechi sou mannyè yo ka fè operasyon eleksyon yo vanse.
Diskisyon sa yo ta dwe pèmèt yo rive jwenn fòmil pou mete kanpe yon misyon entènasyonal ki pou obsève eleksyon yo nan mwa oktòb, novanm ak desanm 2005.
Pou seyans sa a, yo envite espesyalman Arias Nuñez, prezidan Junta Central Electoral an Repiblik Dominikèn. à’ganis sa a se tankou yon Konsèy Elektoral Pèmanan. L ap pataje esperyans li, on fwa ankò, ak manm aparèy elektoral ayisyen an.
Pandan jounen vandredi 17 jen an, patisipan yo pral evalye travay fòs Nasyon Zini yo nan peyi Ayiti. Y ap itilize kòm baz travay yon rezolisyon Konsèy sekirite a te pran, nan dat 31 me 2005, pou pwolonje, pou on ti bout tan, manda fòs Nasyonzini a an Ayiti.
Nou pa ka di si y ap fè Ayiti lòt pwomès lajan, apre Wachinton an jiyè 2004 ak Kayèn an mas 2005. Sèlman, delegasyon ayisyen gen entansyon prezante pwojè konkrè ki ta ka pèmèt peyi a ak òganizasyon entènasyonal debloke pi vit lajan yo te pwomèt peyi a depi ane pase.
Reyinyon Kayèn mas 2005 la te pèmèt peyi d Ayiti ak enstitisyon entènasyonal yo sible pwojè ki te dwe resevwa bourad lajan nan liy Kad Kowoperasyon Enterimè a.
Sou plan ekonomik, yo rive fè nan 3 mwa sa ki pat fèt sou 8 mwa, depi Washinntonn. Men rezilta yo pa pi vizib pase sa. Gen lòt kalte pwoblèm ki vin mete apse sou klou. Ensekirite a lakòz gwo dout sou operasyon elektoral yo, yon dosye ki chè pou kominote entènasyonal la.
Nan peyi Kanada, pandan 2 jou, y ap marye ekonomi ak politik. Se 2 gwo fonksyonè kanadyen ki pral mennen deba teknik yo. James Cokal, nan seksyon Amerik Latin nan ministè Zafè etranjè, ak Guillermo Rishchynski, nan Ajans kanadyen pou devlopman Entènasyonal.
Rete pou konnen, on semèn aprè asanble jeneral OEA a ki te fèt nan peyi Lèzetazini, kisa reyinyon Monreyal yo pral ka pote kòm desizyon konkrè pou elimine vyolans yo an Ayiti epi fè operasyon elektoral yo mache kòm sa dwa, pandan 4 mwa ki rete anvan seri eleksyon yo.
Antouka, minis Zafè etranjè kanadyen an, Pierre Petigrew, ki te mande pou reyinyon sa a fèt, gen anpil konfyans. Li vle yo soti, nan Monreyal, ak desizyon ki ka fè popilasyon an santi l ap vanse nan operasyon ki pou pèmèt yon nouvo prezidan moute sou pouvwa a, 7 fevriye 2006. [wa rc gp 16/06/2005 18:10]
Consulter +
