Haiti
Atik

Imigrasyon : Luis Abinader anonse li pral konstwi, apati mitan lane 2021 an, yon mi, sou liy fontyè ant Ayiti ak Repiblik Dominiken an


Ekri jou lendi 1e mas 2021

Pòtoprens, premye mas 2021 [AlterPresse] --- Nan okazyon 27 fevriye 2021, 177 lane, depi Repiblik Dominikèn te pran lendepandans li sou peyi d Ayiti (se te 27 fevriye 1844), prezidan Repiblik Dominikèn nan, Luis Abinader, anonse li pral konstwi, apati mitan lane 2021 an, yon mi, sou apeprè 400 kilomèt fontyè, ant Ayiti ak Repiblik Dominiken an, dapre enfòmasyon ki vin jwenn ajans sou Entènèt AlterPresse.

Abinader di yo pral mete aparèy ak kamera espeyal, ki pou wè tout mouvman, sou fontyè ant 2 peyi yo.

Li fè konnen tou yo pral idantifye natif natal Ayiti yo, sou teritwa dominiken an.

Otorite dominiken yo gen entansyon vann Leta ayisyen kouran, epi konstwi yon lopital nan zòn fontyè a, sou bò teritwa ayisyen an, yon fason pou yo ka bese kantite Ayisyèn k ap vin akouche nan Repiblik Dominiken an.

Yon teren gen tan disponib nan Wanament, sou fontyè ak Dajabon, pou enstale premye lopital sa a, pou fanm ka akouche nan peyi d Ayiti.

Prezidan dominiken an fè konnen, sou 2 lane, li vle mete yon bout nan gwo pwoblèm imigrasyon san papye, trafik dwòg ak trafik machin, kap fèt depi plizyè lane, sou zile a. [jep emb rc apr 01/03/2021 14:50]