Haiti
Atik

Ayiti-Politik : Plizyè moun manifeste, jedi 18 fevriye 2021 an, nan Kafou, pou mande lage 4 polisye, gouvènman defakto an te arete ansanm ak jij Lakou Kasasyon Yvickel Dabrezil


Ekri jou jedi 18 fevriye 2021

Pòtoprens, 18 fevriye 2021 [AlterPresse] --- Plizyè sitwayèn ak sitwayen pran lari a, jedi 18 fevriye 2021 an, nan Kafou (sid kapital la) pou egzije liberasyon 4 polisye, gouvènman defakto an te arete, bò 2 zè edmi di maten, dimanch 7 fevriye 2021 an, ansanm ak jij Lakou Kasasyon Ivickel Dabrezil, kòmkwa yo te nan marinen yon swadizan koudeta kont Jovenel Moïse, dapre enfòmasyon ki vin jwenn AlterPresse.

Pami moun, ki t ap manifeste yo, te gen fanmi polisye yo, ki di li pa nòmal pou viktim sa yo ap kwoupi nan prizon san rezon.

Yo di yo pa konprann kouman fè jij Dabrezil, gouvènman defakto an te akize kòm moun ki t ap marinen koudeta a, lage epi pou lòt moun yo rete nan prizon.

Moun yo, ki t ap manifeste sou wout ray lan, nan Kafou, te pwofite mete barikad plizyè kote yo pase.

Jij enstriksyon Yvelt Petit Blanc te fè lage majistra Yvickel Dabrezil, jedi 11 fevriye 2021 an, malgre minis jistis defakto an, Mèt Rockfeller Vincent, te pase lòd pou pa lage l. [rf emb rc apr 18/02/2021 13:50]