Haiti
Atik

Dwa moun : Kominote pwotestan an deside mete kanpe yon Komisyon pwotestan mobilizasyon kont diktati nan peyi d Ayiti


Ekri jou jedi 18 fevriye 2021

Pòtoprens, 18 fevriye 2021 [AlterPresse] --- Divès estrikti, nan kominote pwotestan an, deside mete kanpe yon Komisyon pwotestan mobilizasyon kont diktati nan peyi d Ayiti, douvan zak briganday ekip defakto an ap fè sou teritwa nasyonal lan, dapre yon nòt ki rive jwenn AlterPresse.

Komisyon pwotestan mobilizasyon kont diktati nan peyi d Ayiti an gen pou objektif travay ak tout enstitisyon legliz yo, pou bay bourad ak fè mobilizasyon san bri san kont, pou fè respekte Konstitisyon an, espesyalman atik 134-2 a ki di lè manda Jovenel Moise bout la.

Komisyon sa a gen pou misyon fè sansibilizasyon, bò kote tout legliz pwotestan nan peyi a, pou kretyèn ak kretyen yo kapab angaje yo nan batay kont diktati a.

Estrikti sa yo, ki siyen nòt sila a, se Konferans pastè ayisyen yo (Copah), Konsèy nasyonal espirityèl nan legliz Ayiti yo (Conaspeh), Federasyon pastè ayisyen yo (Fepah) ak Federasyon pwotestan Ayiti yo. [jep emb rc apr 18/02/2021 12:30]