Haiti
Atik

Ayiti-Politik : Dènye zak ekip defakto yo pa siye ditou ak demokrasi, dapre gouvènman ameriken an


Ekri jou jedi 18 fevriye 2021

Pòtoprens, 18 fevriye 2021 [AlterPresse] --- Dènye zak ekip defakto an, tankou revoke jij nan lakou Kasasyon ak lonmen lòt jij, dèyè do Konstitisyon an ak lalwa, pakèt zak gwoponyèt yo, vyolans sou jounalis, elatriye… pa siye ditou ak demokrasi.

Se pozisyon gouvènman ameriken an, sou sa k ap pase, nan jou sa yo, nan peyi d Ayiti.

Peyi d Ayiti p ap fèmen bouch li, lè y ap atake enstisyon demokratik yo ak sosyete sivil la nan peyi d Ayiti. Nou leve lavwa kont tout tantativ pou afebli demokrasi an, apati zak vyolans, kraze libète sivik yo ak kaponnay. Respekte prensip demokrasi yo, fondamantal pou lavi chak jou.

Se sa Julie Chung, sekretè deta ameriken an apre, sou sa k ap pase nan peyi Amerik yo, deklare, nan yon tweet, yo rann piblik, nan dat madi 16 fevriye 2021 an, yon tweet AlterPresse te li.

Julie Chung di tèt gouvènman ameriken an chaje anpil, sou dènye zak gwoponyèt, ki depaman ak demokrasi, nan peyi d Ayiti. Tankou : revokasyon ak nominasyon jij nan Lakou Kasasyon, yon sèl grenn moun deside poukont li, epitou atak sou jounalis yo.

Nan tweet sa a, Julie Chung di tou peyi Etazini toujou dakò ak eleksyon ki fèt regilye, nan dat demokrasi an fikse.

Yon lòt fwa ankò, gouvènman ameriken deklare li mande tout pati yo pran angajman, nan òganize, pi vit posib, eleksyon pou senatè ak depite yo, ki deja an reta. Eleksyon lib ak onèt, se sèl chimen pou rebay Ayisyèn ak Ayisyen yo, dwa yo genyen, pou chwazi dirijan yo. [jep emb rc apr 18/02/2021 10:26]