Pòtoprens, 18 fevriye 2021 [AlterPresse] --- Soti lendi premye rive lendi 15 fevriye 2021, gouvènman ameriken an voye, nan peyi d Ayiti, 12 avyon moun depòte, dapre enfòmasyon AlterPresse li nan jounal « Le Nouvelliste ».
Sa fèt, malgre prezidan Joe Biden te siyen yon akò pou di li t ap sispann voye moun tounen nan peyi d Ayiti, lè li va pran mayèt prezidans peyi Etazini, apati 20 janvye 2021 an.
Depite demokrat ameriken Yvette D. Clarke, deklare gouvènman ameriken an ta dwe konsidere sitiyasyon katyouboumbe, ki genyen nan peyi d Ayiti, pou pa pimpe Ayisyen tounen konsa, sou teritwa nasyonal la, dapre enfòmasyon ki vin jwenn AlterPresse.
Genyen plis pase 500 migran Ayisyen depatman Sekirite enterye nan Etazini (Dhs) depòte nan peyi d Ayiti, pandan 2 premye semèn nan mwa fevriye 2021 an, dapre kalkil òganizasyon k ap defann dwa migran yo, ki konn abitye soutni depòte yo pou yo jwenn posibilite pou yo mande azil politik, dapre jounal ayisyen « Le Nouvelliste ».
Pou denonse pil depòtasyon sa yo, Mouvman rezo aksyon familyal (Fanm), koumanse yon kanpay, sou rezo sosyal yo, pou chèche repons nan men prensipal responsab ameriken yo, tankou prezidan Joe Biden, sekretè enteryè a Alejandro Mayorkas, sekretè deta a Anthony Blinken.
Soti 20 mas 2020 rive mwa desanm 2020 an, otorite ameriken yo te depòte, nan bato ak avyon, plis pase 393 mil moun, ki t ap chèche pwoteksyon Etazini sou fwontyè Sid la, san menm yo pa t gen posibilite suiv chimen nòmal la, oubyen respekte lwa sou azil la. [apr 18/02/2021 10:10]
Consulter +
