Haiti
Atik

Ayiti-Dwa moun : Pouvwa defakto a kenbe nan prizon jij Lakou Kasasyon Yvickel Dabrésil, malgre tribinal sivil Kwadèboukè an mande lage l


Ekri jou jedi 11 fevriye 2021

Pòtoprens, 11 fevriye 2021 [AlterPresse] --- Ministè lajistis defakto a kenbe nan prizon jij nan Lakou Kasasyon Yvickel Dabrézil, malgre tribinal sivil Kwadèboukè an mande lage l, apre odyans mèkre10 10 fevriye 2021 an, sou dosye sa a, dapre enfòmasyon ajans sou entènèt AlterPresse ranmase.

Nan yon lèt, ki pote dat 9 fevriye 2021 an, minis jistis defakto a, Rockfeller Vincent, di li mete yon bout, pou yon ti tan, nan aktivite grefye Christophe Lesperance, ki te fèk travay, mèkredi 10 fevriye 2021 an, sou dosye jij Lakou Kasasyon an Yvickel Dabrezil ak 17 lòt prizonye politik yo.

Ni dwayèn tribinal sivil Kwadèboukè an, ni komisè gouvènman an pa t janm resevwa ankenn plent kont Christophe Lesperance, dapre Asosyasyon nasyonal grefye ayisyen yo.

Dekrè 22 dawout 1995 lan di aklè ki jan yo kapab mete yon bout, pou yon ti tan, nan aktivite yon grefye, dapre sa Asosyasyon nasyonal grefye yo raple.

Lè yon grefye gen plent ki depoze kont li, dwayen nan tribinal sivil konsène a dwe òganize yon asanble ak tout jij yo, pou kab deside sou sitiyasyon grefye a.

Konsa tou, si se nan Ministè lajistis yo pote plent kont grefye an, enstitisyon an ap anchaje dosye an, atravè yon selil, ki rele Direksyon zafè jidisyè, pou suivi nesesè yo.

Kèlkeswa minis jistis lan pa ka leve, yon bon maten, pou li mete yon bout nan aktivite yon grefye oubyen arete l, dapre sa prezidan Asosyasyon nasyonal grefye ayisyen yo, mòt Martin Ainé, deklare bay AlterPresse.

Tout avoka, ki sou dosye Yvickel Dabrezil ak 17 lòt prizonye politik yo, lonje dwèt sou otorite defakto yo, k ap fè gwo mache prese ak dosye sa a, nan lide pou fè jij Yvickel Dabrèzil ak 17 lòt moun yo pouri nan prizon.

Avoka sa yo kritike sa k ap fèt, nan dosye sa a, yo konsidere ki gen prejije ladan. Paske, dwayèn tribinal sivil Kwadèboukè an senpman mande lage jis Lakou Kasasyon Yviickel Dabrezil, alòske li voye 17 lòt prizonye politik yo nan prizon.

Yo fè konnen yo pral tanmen yon aksyon, douvan Lakou dapèl, pou voye jete desizyon dwayèn tribinal sivil Kwadèboukè an.

Avoka yo voye jete tou deklarasyon minis defakto jistis lan, ki deklare dosye 18 priizonye politik yo deja douva kabinè enstriksyon. [mj emb rc apr 11/02/2020 15:30]