Miragwán (Ayiti), 21 janvye 2021 [AlterPresse] --- Douvan gwo leve kanpe nan Miragwán (depatman Nip) ak divès lòt kote, tankou Pòtoprens, komisè gouvènman tribinal sivil Miragwán nan, mèt Jean Ernest Muscadin, fè lage, byen ta jedi swa 21 janvye 2021 an, senatè Nènèl Cassy, li te fè arete, sou lòd Jovenel Moïse, dapre enfòmasyon ki vin jwenn AlterPresse.
Senatè Nènel Cassy pase plizyè èd tan minote, 2 bra dèyè, nan komisarya polis Miragwán nan.
Plizyè vwa nan opozisyon an kont ekip tèt kale Jovenel Moïse lan te frape pye atè, pou di sa p ap pase konsa.
« Se dènye gout dlo an. Zak sa a montre ankò volonte diktati ekip tèt kale Jovenel Moïse lan, ki pa asepte popilasyon an gen dwa manifeste, jan Konstitisyon 1987 la garanti sa. Se pou Jovenel Mose vin arete nou tout ».
Se kèk nan pawòl, plizyè vwa, nan opozisyon kont ekip tèt kale Jovenel Moïse lan, te di, apre arestasyon gwo ponyèt kanmrad yo an.
Yo fè konnen yo pral reyini tousuit, pou defini estrateji, pou fini ak rejim diktati sa a, ki vle kale sou teritwa nasyonal la.
Fwa sa a, se dispozisyon pou dechouke Jovenel Moïse, pou pi ta nan dat 7 fevriye 2021, nan peyi d Ayiti.
Nan apremidi jedi 21 janvye 2021 an, Pakè tribinal sivil Miragwán nan te fè arete senatè depatman Nip Nènel Cassy, youn nan poto mitan opozisyon kont Jovenel Moïse lan.
Nènel Cassy t al fè demach, nan komisarya polis Miragwán nan, pou fè lage moun, ki t ap manifeste, nan Miragwán, jedi 21 janvye 2021 an, lapolis te arete. Yon manifestasyon plizyè santèn moun, ki te soti divès kote nan Sid peyi d Ayiti, lapolis gaye anba gwo kout zam
Nan manifestasyon jedi 21 janvye 2021 an, 2 jèn gason blese anba bal, lapolis arete plizyè moun, ki te leve kanpe, nan depatman Nip peyi an, espesyalman nan komin Miragwàn.
Moun, ki te pran lari yo, te vle lonje dwèt sou komisè gouvènman Miragwán nan, mèt Jean Ernest Muscadin, ki mete l ankwa kont tout mouvman pwotestasyon kont ekip tèt kale, ki sou pouvwa a, nan depatman Nip.
Jedi 21 janvye 2021 an, moun, ki t ap manifeste nan Miragwán, te leve vwa yo tou pou kontinye ekzije Jovenel Moise respekte Konstitisyon an, ki di manda l ap bout dimanch 7 fevriye 2021. [rc apr 21/01/2021 21:00]
Consulter +
