Pòtoprens, 11 janvye 2021 [AlterPresse] --- Òganis dwa moun yo Fondasyon je klere (Fjkl) mande ekip tèt kale Jovenel Moïse kanpe sou pwojè vini ak yon lòt Konstitisyon, li vle fè nan peyi a san gade dèyè, nan yon nòt ki rive jwenn AlterPresse.
Se sa ki ka anpeche peyi a tonbe nan plis katchouboumbe, dapre Fjkl, ki fè Jovenel Moïse sonje ki jan non l deja site, nan eskandal kòripsyon ak zak maspinay dwa moun.
Pou Fjkl, pase men nan Konstitisyon an, jan ekip Jovenel Moïse lan vle fè l lan, pral mete sou kote gwoup, katye, zòn ak lòt kouch enpòtan nan sosyete a.
Sityasyon ensekirite a pa pèmèt yon aktivite konsa, dapre Fjkl, ki denonse klima laterè, bandi ak zam ap simaye nan sosyete an, kote polisye nasyonal ap viktim tou.
Anplis Fjkl, plizyè lòt sektè, sitou politik, kritike pwojè vini ak yon lòt Konstitisyon an, ki, dapre yo, se yon fason Jovenel Moïse ap fè pou mete kanpe yon diktati nan peyi a. [rf emb rc apr 11/01/2021 14:55]
Consulter +
