Sen Rafayèl (depatman Nò peyi d Ayiti), 11 janvye 2021 [AlterPresse] --- 6 moun mouri ak bal ak yon lòt blese, se bilan yon atak bandi ak zam fè, lannuit jedi 7 janvye 2021 an, nan yon peristil Savàn Dyàn, yon lokalite nan komin Sen Rafayèl, kote yo t ap fè yon seremoni pou kwape bandi, ki pa sispann vòlè bèt ak lòt pwodui peyizan yo plante.
Pami 6 moun ki mouri yo, genyen Aronce Garçon, ki se yon oungan, Odino, Milien ak Minouse, dapre enfòmasyon Ajan ekzekitif enterimè nan komin nan, Ménéide Moïse, bay AlterPresse/AlterRadio.
Sitiyasyon sekirite an, nan komin Sen Rafayèl, pa depaman ak jan sa ye nan rès peyi an, dapre Ménéide Moïse.
Klima laterè an lakoz anpil fanmi blije bandone lakay yo, nan Sen Rafayèl, menm jan ak moun katye Bèlè yo, nan Pòtoprens.
Ajan ekzekitif enterimè an mande Direksyon depatman Nò polis nasyonal lan ranfò, pou pote yon solisyon nan pwoblèm ensekirite a, ki blayi tou nan komin Sen Rafayèl. [jep emb rc apr 11/01/2021 15:00]
Consulter +
