Pòtoprens, 28 desanm 2020 [AlterPresse] --- Pil ak pakèt zak maspinay dwa moun yo, boulvès politik yo ak lavi chè, se kèk nan sitiyasyon, ki pouse peyi d Ayiti fè plis bak, pandan lane 2020 an, dapre enfòmasyon AlterPresse/AlterRadio ranmase.
Pandan lane 2020 an, lavi chè fè mikalaw nan peyi d Ayiti. Ekonomi an bese ba nèt alkole. Gouvènman an pa bay rezilta ditou. Se dizon ekonomis Camille Chalmers, ki t ap pale ak AlterPresse/AlterRadio.
Pandan lane 2020 an, peyi an genyen yon lavi chè ki vin pi malouk, ki depase nivo 23 pousan.
Chalmers fè konnen sitiyasyon sa yo vin fè nou fini ane a, nan yon sitiyayon politik grav, kote gen plizyè santèn moun ki viktim anba bal epi gen plizyè santèn lòt ki viktim anba zak kidnapin, bandi ak zam ap simen sou teritwa nasyonal la.
Otorite yo gen lamayòl, pran premye pri, nan fason yo pa respekte dwa moun, pandan lane 2020 an. Se an gwoponyèt, nan zak brital, lapolis te kraze divès manifestasyon sitwayèn ak sitwayen, ki t ap ekzije respè dwa moun yo. Se dizon kolektif 4 desanm 2013, ki t ap reponn kesyon AlterPresse/AlterRadio.
Lajistis tou pa mache kòmsadwa, non plis, pandan lane 2020 an. Sa ki lazok anpil prizonye poko janm pase douvan jij yo, toujou dapre Kolektif 4 desanm 2013 lan.
Lane 2020 an, k ap fini an, se te yon lane, kote peyi a fè bak : sou kesyon dwa moun, sou kesyon politik, elatriye, dapre pati politik Rasanbleman sosyal demokrat pou pwogrè peyi d Ayiti.
Apre peyi lòk, sou plan politik, peyi lòk nan gouvènman, kounye a se peyi lòk nan ekonomi an. Se analiz, sou bò pa l, pati politik Mouvman patriyotik popilè desalinyen (Mopod), ki wè pespektiv yo sonm, pou peyi d Ayiti, nan lane 2021 an, k ap pwente an.
Pou Mopod, popilasyon an vin nan plis mizè. Bandi, kidnaping anvayi peyi a. Yon sitiyasyon, ki vin fè, divès kote nan peyi a, espesyalman Pòtoprens, tounen yon gwo prizon, toujou dapre Mopod. [jep emb rc apr 28/12/2020 09:15]
Consulter +
