Pòtoprens, 28 desanm 2020 [AlterPresse] --- Klima laterè, bandi ak zam yo ap plede simaye san gade dèyè, sou teritwa nasyonal la, se sousi popilasyon, nan peyi d Ayiti, finisman ane 2020 an, dapre enfòmasyon AlterPresse/AlterRadio ranmase.
Lannuit samdi 26 desanm 2020 an, nan Okap, depatman Nò peyi d Ayiti, yon enspektè polis, Ferais Telfort, mouri anba plizyè bal bandi ak zam, yo poko idantifye.
Bandi ak zam yo atake ofisye polis lan nan Titans, nan yon lokalite ki pote non Kafou Lacho. Viktim nan te resevwa plizyè katouch.
Pou lane 2020 an sèlman, gen plis pase 30 polisye, ki tonbe anba bal nan peyi an, dapre yon rapò Rezo nasyonal k ap defann dwa moun (Rnddh).
Gang ak zam yo kontine rapousuiv zak malfektè yo san gade dèyè, sou teritwa nasyonal la.
Malgre fanmi l bay gwo kout fòs lajan, gang ak zam toujou kenbe travayè sosyal Jean Reynold Saint-Hilaire, y ap fè sibi anpil mati.
Depi madi swa 22 desanm 2020 an, baz gran grif nan Savyen, depatman Latibonit, kidnape Jean Renold Saint-Hilaire, pandan li t ap kouri nan lopital nan Latibonit, pou l te ka jwenn san pou madanm li, ki fè sezaryèn.
Anplis kòb bandi ak zam yo jwenn nan machin li, yo evalye nan nivo mil dola ameriken, yo gen tan pran nan men fanmil plizyè kout fòs lajan. Youn, se 500 mil goud, lòt la se 250 mil goud ak 3mil 500 dola ameriken.
Yon lòt bò, federasyon bawo avokat ak avoka peyi d Ayiti yo soti nan lapenn, apre bandi ak zam lage, samdi 26 desanm 2020 an, anba gwo kout fòs lajan, mèt avoka Jean Ronald Derinvil, sou 5 jou depi yo te dappiyanp li.
Bandi ak zam, yo poko idantifye, te dappiyanp mèt Jean Ronal Derinvil, nan dat samdi 19 desanm 2020 an.
Federasyon bawo Ayiti yo, ki te kenbe kontak sere ak direktè jeneral polis lan, Léon Charles, ak otorite nan Direksyon santral polis jidisyè a, kritike konpòtman otorite yo, nan gouvènman an, ki pa fè anyen douvan sitiyasyon sa a.
Nan siyiyasyon malouk sa a, kote bandi ak zam kontinye ap dappiyanp moun, chak jou pi plis, Federasyon bawo avokat ak avoka peyi d Ayiti yo lanse yon apèl bay tout zanmi ak alye l yo, ki an Ayiti kou nan entènasyonal lan, pou yo ranfòse batay lan kont fòs fè nwa, ki menase pote peyi an ale. [jep rf emb rc apr 28/12/2020 08:35]
Consulter +
