Haiti
Atik

Politik : Ensekirite a lakoz aktivite touris yo sou lagraba nan peyi d Ayiti


Ekri jou madi 22 Desanm 2020

Pòtoprens, 22 desanm 2020 [AlterPresse] --- Boulvès politik peyi d Ayiti ap viv depi anviwon 3 lane, ensekirite ak ogmantasyon zak bandi yo nan peyi an : se kèk pami sitiyasyon, ki eksplike aktivite touris yo sou lagraba sou teritwa nasyonal la, avèk gwo konsekans sou ekonomi peyi an, dapre Gwoup k ap apiye ak fè refleksyon sou touris ayisyen an, nan yon entèvyou li bay AlterRadio/AlterPresse.

Boulvès politik ak ensekirite a, espesyalman zak bandi yo, fè moun gen mwens enterè pou fè vwayaj nan direksyon Ayiti, depi nan lane 2018.

Sityasyon sa a lakòz peyi an pèdi pye nan monn lan, sou kat touris lan.

Rive gwo epidemi kowona an, apati mwa mas 2020 an, vin angrave sitiyasyon an, kote pa gen touris ki vwayaje ankò, ni nan peyi an, ni nan nivo entènasyonal, dapre konsiderasyon Gwoup k ap apiye ak fè refleksyon sou touris ayisyen an.

Sou kesyon kowonaviris lan, k ap fè ravaj nan monn lan, ki anpeche peyi an louvri pou etranje, otorite ayisyen yo ta dwe chèche yon fòmil, ki adapte ak Ayiti, pou devlopman touris lan.

Se sitou aktivite touris, k ap mache anndan peyi a kou deyò peyi a, ki ta ka pote solisyon nan pwoblèm dola an, k ap pran valè douvan goud lan depi yon bon bout tan, nan peyi d Ayiti, dapre Gwoup k ap apiye ak fè refleksyon sou touris ayisyen an. [rf emb rc apr 22/12/2020 13:00]