Pòtoprens, 21 desanm 2020 [AlterPresse] --- Jij enstriksyon Renord Régis, ki anchaje travay sou dosye kò sasinay, vandredi 28 dawout 2020 an, sou mèt Monferrier Dorval lan, konvoke, pou vandredi 15 janvye 2021, k ap vini an, premye minis tèt kale an, Joseph Jouthe, pou vin pale kòm temwen, sou kozman an, dapre sa ajans AlterPresse aprann.
Piske Joseph Jouthe ap jwe wòl premyee minis, se selman prezidan repiblik lan, Jovenel Moïse, ki kapab bay otorizasyon pou jij enstriksyon an tande l.
Atik 400 kòd enstriksyon kriminèl lan di gwo fonksyonè nan Leta yo p ap janm ka site kòm temwen, menm pou deba k ap fèt an prezans jiri, si se pa prezidan repiblik lan, sou demann yon pati ak rapò sekretè deta lajistis lan, ki pou bay otorizasyon pou gwo fonksyonè leta yo ta reponn envitasyon sa yo, atravè yon òdonans espesyal.
Nan yon entèvyou li bay AlterRadio/AlterPresse, Bawo lòd avokat ak avoka Pòtoprens yo salye jefò jij enstriksyon Renord Régis, ki anchaje travay sou kò sasinay, vandredi 28 dawout 2020 an, sou mèt Monferrier Dorval lan (sa pral gen 4 mwa lendi 28 desanm 2020, k ap vini an).
Bawo lòd avokat ak avoka Pòtoprens yo di l te swete demach yo fèt pi vit, pase jan sa ye kounye a.
Sekretè jeneral Bawo a, mèt Robinson Pierre-Louis, lonje dwèt sou Direksyon santral polis k ap travay pou lajistis lan (Dcpj), ki gen ladann polis syantifik, li di ki pa janm remèt ankenn rapò teknik, ki pou ta pèmèt dosye a vanse, alòske enstistisyon sa a gen tout enfòmasyon nesesè yo nan men l.
Bawo lòd avokat ak avoka Pòtoprens yo fè konnen l ap toujou rete veyatif, pou dosye lajistis pou mèt Monferrier Dorval lan pa rete nan tiwa. [emb rc apr 21/12/2020 14:25]
Consulter +
