Pòtoprens, 15 desanm 2020 [AlterPresse] --- Komisyon legliz katolik women, Jistis ak lapè (Jilap) mande otorite ayisyen yo fè swivi nesesè, sou zak maspinay dwa moun, yo repwoche 2 ansyen ofisyèl nan gouvènman an, Fednel Monchery ak Pierre Richard Duplan, ak chèf gang, Jimmy Chérizier, yon ansyen polisye nasyonal yo plis konnen sou non Babekyou.
Jilap kritike ekip, ki sou pouvwa an, ki pa janm fè anyen, depi plis pase 2 zan, depi masak novanm 2018 yo, nann katye Lasalin, Pòtoprens, pou fanmi viktim yo jwenn jistis, malgre divès òganizasyon dwa moun nan peyi an pa janm sispann lonje dwèt sou zak maspinay dwa moun yo.
Atravè divès zak l ap poze, ekip tèt kale, ki sou pouvwa a, montre anbisyon l pou tabli diktati. Sitiyasyon sa a pa ka ale pi lwen, dapre sa Jocelyne Colas, direktris Jilap, di nan yon entèvyou li bay AlterPresse/AlterRadio.
Tout dekrè, Jovenel Moise pran yo, espesyalman sa ki arevwa ak Ajans nasyonal entelijans lan ak sekirite piblik, ki ta dwe gen repondong nan peyi a, montre aklè ekip tèt kale, ki sou pouvwa a, pa gen ankenn volonte pou konstwi peyi, dapre Jilap.
Pozisyon Core group lan pran an, kont dekrè sa yo, kapab yon reaksyon benyen kache lonbrit.
Estrikti yo rele Core group lan pa t janm pran distans li ak kantite move zak ekip tèt kale, ki sou pouvwa a, dapre sa Jilap fè sonje. [jep emb rc apr 15/12/2020 13:26]
Consulter +