Haiti
Atik

Ayiti-Krim : Maspinay san gade dèyè dwa fondamantal moun, se mak fabrik rejim tèt kale manfouben an, daprè Rnddh ak Fjkl


Ekri jou vandredi 11 Desanm 2020

Pòtoprens, 11 desanm 2020 [AlterPresse] --- Maspinay san gade dèyè dwa fondamantal moun ak maspinay libète sitwayèn ak sitwayen : se mak fabrik rejim tèt kale manfouben an, dapre deklarasyon Rezo nasyonal k ap defann dwa moun yo (Rnddh) ak Fondasyon je klere (Fjkl) fè nan okazyon Jounen entènasyonal dwa moun, jedi 10 desanm 2020 an.

Nan yon nòt ki rive jwenn AlterPresse, Rezo nasyonal k ap defann dwa moun yo siyale kouman y ap pilonnen dwa moun, san gade dèyè, nan peyi d Ayiti.

Pou lane 2020 an sèlman, pou piti 185 moun, pami yo 25 fanm ak 5 timoun, pèdi lavi yo nan masak ak atak, bandi ak zam fè nan katye popilè depatman Lwès yo, daprè enfòmasyon Rezo naasyonal k ap defann dwa moun yo ranmase.

Gen tou 32 polisye nasyonal, ki mouri anba bal tou, pou lane 2020 an.

2020 an, se yon lane kote anpil gwo krim, ki pa t janm fèt nan peyi an depi nan lane 1986, rive fèt.

Kòm egzanp, Rezzo nasyonal k ap defann dwa moun yo fè sonje kò ansasinay, vandredi swa 28 dawout 2020 an, sou batonye Pòtoprens lan, mèt Monferrier Dorval lan, ki mouri tou pre kote prezidan Jovenel Moise rete an, epitou ka etidyan Grégory Saint-Hilaire, ki resevwa bal ajan Usgpn (polisye ki nan sekirite Palè nasyonal) nan lokal Lekòl nòmal siperyè, ki nan Inivèsite Leta ayisyen an.

Peyi d Ayiti ap fè fas kare ak yon Leta manfouben, ki byen vag, douvan zak maspinay dwa moun yo, tankou pil ak pakèt moun ki blije ap kouri kite kay yo, akoz klima laterè sou teritwa nasyonal lan. Se pozisyon òganis dwa moun Fondasyon je klere (Fjkl), nan yon dokiman li mete deyò, ki vin jwenn AlterPresse.

Ekip tèt kale, ki sou pouvwa an, gen 2 diskou, depaman youn ak lòt, dapre Fjkl.

Yo gen yon diskou ofisyèl, ki ta vle fè pwomosyon pou jistis ak batay kont koripsyon.

Yo gen yon lòt diskou, anba tab, k ap mobilize fòs fè nwa, pou fè zak maspinay politik, fè vye akò avèk gang ak zam, eskadwon lanmò, pou simen dèy nan fanmi ayisyeen yo.

Gen plizyè evenman terib, ki, jounen jodia, fè yon pakèt sitwayèn ak sitwayen pèdi byen yo, tankou divès atak ki fèt sou Bèlè, nan Pòtoprens, mache piblik ki pran dife nan peyi a pandan plis pase 20 fwa, laterè bandi ak zam fè nan Pon wouj, atak kont espas kote moun andikape yo tabli kò yo nan Delma, elatriye.

Fondasyon je klere rete kwè otorite konsène yo pa janm eseye ni chèche, ni idantifye, ni bay moun, ki responsab zak maspinay dwa moun sa yo, pinisyon yo merite, nan yon peryòd latwoublay politik san parèy konsa.

Tout zzak maspinaay dwa moun sa yo plis lakoz vyolans ak enpinite kontinye layite nan peyi d Ayiti. [rf emb rc apr 11/12/2020 13:15]