Pòtoprens, 10 desanm 2020 [AlterPresse] --- Kontrèman ak lòt sektè ki kwè kreyasyon Ajans nasyonal entèlijans lan se yon mwayen pou prezidan repiblik lan mete baboukèt nan bouch popilasyon an, konseye chèf Leta a, Guichard Doré, fè konnen estriti sa a ta yon mwayen pou gouvènman, ki sou pouvwa a, ta rann enstitisyon yo pi djanm nan peyi d Ayiti, nan yon entèvyou li bay AlterRadio/AlterPresse.
Ajans nasyonal entelijans lan ta gen pou objektif kwape ensekirite an epi pèmèt popilasyon an ale nan aktivite l kòmsadwa.
Guichard Doré fè konnen tou Ajans lan genyen pou misyon, pami lòt yo, pwoteje dwa fondamantal chak sitwayen nan peyi a,
Dekrè sou ajans entèlijans lan depaman ak Kontitisyon 1987 la, dapre sa Rezo nasyonal k ap defann dwa moun yo (Rnddh) deklare.
Konseye prezidan an fè konnen se mank enstitisyon ransèyman nan peyi a, ki te febli Leta a. Se ya pou sa prezidan Jovenel Moïse ap mete enstitisyon sa yo kanpe, pou kapab garanti sekirite piblik la.
Dekrè sa a konsidere tankou zak teroris kesyon kidnaping, kenbe moun, barikad moun k ap pwoteste konn mete nan lari yo, kraze byen piblik, posede zam ki depaman ak lalwa, polisye ki ta kwaze bra yo douvan yon seri zak malonèt, elatriye.
Tout moun, ki ta fè zak sa yo, kapab pase ant 30 jiska 50 lane prizon, epi y ap gen pou peye yon amann ant 2 milyon goud pou rive 200 milyon goud.
Detan li rekonèt li nòmal pou peyi an gen enstitisyon ransèyman, Rezo nasyonal majistra ayisyen yo (Renamah) fè konnen se entistisyon, ki la pou fè lwa nan peyi an, ki gen responsablite fè lwa. Se pa gouvènman an. [rf emb apr 10/12/2020 14:00]
Consulter +