Pòtoprens, 8 desanm 2020 [AlterPresse] --- Jedi 10 desanm 2020 an, nan okazyon jounen entènasyonal dwa moun yo, òganis dwa moun yo anonse y ap desann nan lari, pou fè tande vwa yo kont maspinay dwa moun nan peyi a, dapre enfòmasyon ajans AlterPresse ranmase.
Nan okazyon an tou, gen òganizasyon Viv Ayiti, ki pral manifeste kont ensekirite Leta a, kont krim Leta ap fè yo, kont kidnaping ak kont koripsyon.
Nan yon kozman ak laprès, lendi 7 desanm 2020 an, Viv Ayiti denonse klima laterè san parèy, k ap layite sou teritwa nasyonal la, pandan otorite, nan konsèy siperyè lapolis nasyonal lan, lapolis ak lajistis pa fè anyen.
Pou manm òganizasyon sosyopolitik sa a, se sitiyasyon sa a menm, ki bay moun k ap fè kidnaping yo plis pòtinite, pou kontinye dappiyanp moun nan peyi an.
Manm estrikti politik sa a akouraje òganizasyon sosyal nan peyi an, pati politik yo, tout sitwayèn ak sitwayen angaje, chèche jwenn yon akò, yon antant, pi vit posib, sou fason pou ranplase Jovenel Moïse, apre 7 fevriye 2021. [rf emb rc apr 08/12/2020 14:20]
Consulter +
