Pòtoprens, 07 desanm 2020 [AlterPresse] --- Dekrè, sou ajans nasyonal entelijans lan (Ani), se yon fason pou tabli diktati nan peyi a. Se dizon plizyè òganizasyon politik ak sosyal, nan entèvyou yo bay AlterRadio/AlterPresse.
Yon dekrè konsa, se diktati li vin tabli nan peyi a, dapre rasanbleman sitwayèn ak sitwayen Kolektif 4 desanm 2013.
Pou kowodonatè kolektif 4 desanm 2013 lan, Jean Robert Argan, se yon fason pou otorite yo legalize represyon nan peyi a epi voye jete byen lwen revandikasyon popilasyon an.
Dekrè, sou ajans nasyonal entelijans lan, depaman ak Konstitisyon peyi a. Se yon dekrè k ap vin pi angrave, pi plis, sitiyasyon briganday sou teritwa nasyonal lan, dapre pati politik Mouvman patriyotik popile desalinyen (Mopod).
Pou enjenyè agwonom Jean André Victor, dekrè sa a pase anba pye dwa manifestasyon. Se yon dekrè ki kapab lage peyi a nan plis kachouboumbe.
Ak dekrè sa a, nenpòt bandi, ki nan zak kidnaping, gen dwa antre lakay nenpòt ki moun, epi fè tèt li pase pou ajan Ani, pou vin dechèpiye yo, dapre pati politik Fizyon sosyodemokrat yo (Fizyon).
Sekretè jeneral Fizyon an, Rosemond Pradel, konsidere popilasyon an poko konprann dekrè Jovenel Moise pran an.
Atik 3, nan dekrè 26 novanm 2020 an, sou sekirite piblik la, vle mete moun k ap fè revandikasyon, pou fè respekte dwa yo nan lari an, nan menm panye ak bandi k ap fè kidnaping yo.
Pati politik Fizyon mande popilasyon an louvri je l, pou li ka leve kanpe kont wout, ekip tèt kale an vle fè peyi a pran an.
Dekrè Jovenel Moïse lan prevwa sanksyon, pou tout moun ki, yon fason oubyen yon lòt, ap kreye latwoublay nan espas piblik yo.
Dekrè sa a konsidere tankou zak teroris kidnaping, kenbe moun, barikad moun k ap pwoteste konn mete nan lari yo, kraze byen piblik, posede zam ki depaman ak lalwa, polisye ki ta kwaze bra yo douvan yon seri zak malonèt, elatriye.
Tout moun, ki ta fè zak sa yo, kapab pase ant 30 jiska 50 lane prizon, epi y ap gen pou peye yon amann ant 2 milyon goud pou rive 200 milyon goud. [jep emb rc apr 07/12/2020 09:50]
Consulter +
