Pòtoprens, 03 desanm 2020 [AlterPresse] --- Se feblès lajistis ak lapolis, ki lakòz bandi yo ap simen dèy, vire tounen, nan peyi d Ayiti.
Se dizon òganizasyon k ap fè pwomosyon dwa moun ak gouvènans demokratik, « Jurimédia », nan yon entèvyou li bay AlterPresse/AlterRadio.
Li kritike enpinite an ak enstitisyon piblik yo, ki pa prezan nan katye popilè yo, pou anpeche zak bandi yo.
Jurimédia denonse kòkòday, ki genyen ant otorite Leta yo ak plizyè chèf gang, òganizasyon dwa moun yo idantifye kòm moun ki gen men yo tranpe nan divès masak, sou teritwa nasyonal lan.
Pwoblèm sa a ap toujou rete doubout nan peyi an. Li kapab vin pi grav, chak jou pi plis, si popilasyon ayisyen an pa jwe wòl grandèt majè li.
Nan semèn nan, premye minis ayisyen an, Joseph Jouthe, envite popilasyon an rete veyatif, nan yon moman kote zak kidnaping yo ap vale teren nan peyi an, espesyalman nan nan zòn metwopoliten Pòtoprens lan.
Joseph Jouthe pwomèt gouvènman l lan ap fè tout mwayen posib, pou kwape fenomèn sila a.
Nan yon nòt li mete deyò dimanch 29 novanm 2020 an, òganis dwa moun Fondasyon je klere (Fjkl) konte 5 moun bandi kidnape, pandan mwa novanm 2020 an. [rf emb rc apr 03/12/2020 11:55]
Consulter +