Pòtoprens, 30 novanm 2020 [AlterPresse] --- Se twòp atò. Nou leve kanpe kont kidnaping, k ap plede gaye toupatou, nan peyi d Ayiti. Kidnaping kanmarad chofè nou an, se dènye k ap rive.
Se kèk, pami pawòl pwotestasyon chofè ak anpil lòt sitwayen, sou wout Kanape Vè, nan Pòtoprens, ki bloke, depi byen bonè maten lendi 30 novanm 2020 an, dapre temwayaj ajans AlterPresse ranmase.
Plizyè sitwayen bloke wout Kanape Vè an, avèk barikad. Yo boule kawotchou tou.
Objektif mouvman yo an, se pou egzije bandi ak zam yo lage, san pèdi tan, yon chofè transpò piblik, yo rele Gary, ak 2 elèv lekòl, bandi ak zam dappiyanp, wikenn pase a, sou wout Boudon an.
Bandi ak zam yo ta mande 100 mil dola ameriken, pou lage chofè an ak 2 elèv lekòl sa yo.
Moun, k ap pwoteste nan lari a, nan Kanape Vè, estomake, dèske gen polisye ki di yo, se pou y al travay, pou eseye sanble lajan, pou remèt bay bandi ak zam yo, pou yo ta fè lage chofè transpò piblik la.
Yo deside kontinye mouvman leve kanpe sa a, jouk otorite konsène yo pran bon jan dispozisyon, pou kwape krim laterè sa yo, espesyalman zak kidnaping yo, sou teritwa nasyonal lan.
Sikilasyon machin paralize tou ak barikad, lendi maten 30 novanm 2020 an, nan Tijo, Bwa Vèna ak plizyè lòt katye, nan Pòtoprens.
Pandan tan sa a, sou wout Boudon an tou, toujou nan Pòtoprens, te gen plizyè machin yo te mete an kwa, sitou nan zòn bò kote lokal Ofis pwoteksyon sitwayèn ak sitwayen an ye a.
Se toujou nan lide, pou pwoteste kont zak kidnaping yo k ap ogmante san gade dèyè nan peyi a.
Jan l ap fè sa, depi plizyè mwa, lapolis nasyonal simen ankò gaz lakimojèn, lendi maten 30 novanm 2020 an, pou eseye gaye moun, ladan yo doktè ak etidyan, ki t ap manifeste nan Pòtoprens, kont zak kidnaping yo, k ap kontinye, anba reny enpinite, san lapolis nasyonal pa fè anyen pou desoutire zak bandi ak zam sa yo. [rf rc apr 30/11/2020 12:30]
Consulter +
