Ranmase jounen an
Pòtoprens, 18 nov. 2020 [AlterPresse] --- Nan okazyon manifestasyon 18 novanm 2020 an, nan Pòtoprens, yon manifestan mouri anba bal nan tèt, sou Channmas, toupre palè nassyonal. Gen 2 lòt moun ki blese, lè yon machin Lapolis ta fonse sou yon moto, ki te gen 2 moun sou li, dapre imaj ki gaye sou rezo sosyal yo.
Pati politik Ayiti an aksyon fè konnen li gen yon militan l, ki mouri anba bal, ak 2 lòt ki blese anba bal.
Nan divès zòn, nan peyi a, gen plizyè moun ki blese anba bal, nan lese frape ant polisye ak manifestan, mekredi 18 novanm 2020 an, dapre enfòmasyon AlterPresse/AlterRadio rasanble.
Nan kad manifestasyon 18 novanm 2020 yo, sekretè jeneral pati politik Pitit Desalin, Jean Charles Moise, te bay yon mesaj, toupre anbasad ameriken, kote l voye toya sou divès manm, nan opozisyon an.
Plizyè santèn moun te desann nan lari, san bri san kont, nan Jeremi, depatman Grandans, kont klima laterè an epi pou ekzije demisyon Jovenel Moise sou pouvwa a.
Sektè demokratik ak popilè a (Sdp) bat bravo pou gwo jounen mobilizasyon, mèkredi 18 novanm 2020 a, divès kote, sou teritwa nasyonal lan, malgre lapolis te simen gaz ankò sou moun ki t ap manifeste.
Detan li anonse moblizasyon an ap kontinye, pou retire Jovenel Moïse sou pouvwa a, pati politik Inifòs lonje dwèt sou otorite yo, ki bay lapolis la dwa, pou touye manifestan epi simaye gaz lakimojèn sou yo.
Batay Vètyè 18 novanm 1803 a ta dwe sèvi ekzanp, pou yon tèt ansanm, ki ta ka sove peyi a. Se dizon Jovenel Moïse, detan li t al depoze yon bouke flè, nan pye moniman Jean Jacques Dessalines, nan memwa zansèt yo. [apr 18/11/2020 19:00]
Consulter +
